ٹائٹینک کی لائف جیکٹ 25 کروڑ روپے میں نیلام

ٹائٹینک کے ایک زندہ بچ جانے والے مسافر کی ایک نایاب لائف جیکٹ برطانیہ میں ہونے والی نیلامی میں ریکارڈ قیمت پر فروخت ہو گئی ہے۔
برطانوی آکشن ہاؤس ہنری ایلڈرج اینڈ سن کے مطابق یہ تاریخی لائف جیکٹ 9 لاکھ 4 ہزار 500 امریکی ڈالر میں نیلام ہوئی، جو پاکستانی کرنسی میں 25 کروڑ روپے سے زیادہ بنتی ہے۔ ماہرین نے اس کی قیمت نیلامی سے پہلے تقریباً 3 لاکھ 39 ہزار سے 4 لاکھ 74 ہزار ڈالر تک لگائی تھی، تاہم یہ اندازہ اس کی حتمی قیمت سے کافی کم ثابت ہوا۔
یہ لائف جیکٹ لورا میبل نامی خاتون نے استعمال کی تھی جو 1912 میں ٹائٹینک کے بدقسمت سفر کے دوران جہاز پر موجود تھیں۔ لورا میبل فیشن ڈیزائنر لوسی ڈف گورڈن کی سیکرٹری تھیں اور اسی جوڑے کے ساتھ سفر کر رہی تھیں۔ وہ لائف بوٹ نمبر 1 کے ذریعے دیگر افراد کے ساتھ محفوظ رہیں۔
نیلام ہونے والی اس جیکٹ کی خاص بات یہ بھی ہے کہ اس پر لورا میبل اور لائف بوٹ میں سوار بعض افراد کے دستخط بھی موجود ہیں، جس نے اسے مزید تاریخی اہمیت دے دی۔
یہ نیلامی ٹائٹینک اور وائٹ اسٹار لائن سے متعلق یادگاری اشیا کی خصوصی فروخت کا حصہ تھی۔ آکشن ہاؤس کے مطابق ٹائٹینک سے جڑی ہر چیز ایک منفرد کہانی رکھتی ہے اور یہ لائف جیکٹ بھی اسی تاریخ کا ایک اہم ٹکڑا ہے۔
خریدنے والے شخص کی شناخت ظاہر نہیں کی گئی۔
یاد رہے کہ یہ لائف جیکٹ اس سے قبل بلفاسٹ کے ایک میوزیم میں محفوظ رکھی گئی تھی۔