فی تولہ سونا 1400 روپے اضافے کے بعد نئی بلند سطح پر

مقامی صرافہ بازار میں سونے اور چاندی کی قیمتوں میں ایک بار پھر اضافہ ریکارڈ کیا گیا ہے، جس کے بعد خریداروں کے لیے قیمتی دھاتوں کی خریداری مزید مہنگی ہو گئی ہے۔
جیولرز ایسوسی ایشن کے مطابق فی تولہ سونے کی قیمت میں 1400 روپے کا اضافہ ہوا ہے، جس کے بعد نئی قیمت 5 لاکھ 4 ہزار 862 روپے تک پہنچ گئی ہے۔ اسی طرح 10 گرام سونے کی قیمت 1200 روپے بڑھ کر 4 لاکھ 32 ہزار 837 روپے ہو گئی ہے۔
چاندی کی قیمت میں بھی اضافہ دیکھنے میں آیا ہے۔ فی تولہ چاندی 110 روپے مہنگی ہو کر 8 ہزار 514 روپے کی سطح پر پہنچ گئی ہے۔
عالمی مارکیٹ میں بھی سونے کی قیمتوں میں اضافہ ریکارڈ کیا گیا، جہاں فی اونس سونا 14 ڈالر اضافے کے بعد 4 ہزار 825 ڈالر تک جا پہنچا ہے۔
ماہرین کے مطابق عالمی سطح پر قیمتوں میں اتار چڑھاؤ کے اثرات مقامی مارکیٹ پر بھی مرتب ہو رہے ہیں، جس کے باعث سونے اور چاندی کی قیمتوں میں مسلسل تبدیلی دیکھنے میں آ رہی ہے۔