ایران کشیدگی: 16 امریکی فوجی طیارے تباہ

ایران کے ساتھ جاری کشیدگی کے دوران امریکی فضائیہ کو نمایاں نقصانات کا سامنا کرنا پڑا ہے۔ بلومبرگ کی ایک رپورٹ کے مطابق اب تک کم از کم 16 امریکی فوجی طیارے تباہ ہو چکے ہیں، جن میں 10 ریپر ڈرونز بھی شامل ہیں۔
رپورٹ میں بتایا گیا ہے کہ ان نقصانات میں کچھ دشمن کی کارروائیوں کا نتیجہ ہیں جبکہ کئی حادثات بھی پیش آئے۔ کویت میں ایک واقعے کے دوران دوستانہ فائرنگ کے باعث تین ایف-15 جنگی طیارے تباہ ہوگئے۔ اسی طرح ایک کے سی-135 اسٹریٹوٹینکر طیارہ ایندھن بھرنے کے عمل کے دوران حادثے کا شکار ہوا، جس میں سوار تمام چھ اہلکار ہلاک ہوگئے۔
مزید برآں، سعودی عرب کے ایک ایئر بیس پر موجود پانچ کے سی-135 طیاروں کو ایرانی میزائل حملے میں نقصان پہنچنے کی اطلاعات ہیں۔
رپورٹ کے مطابق ایرانی دفاعی نظام نے اب تک زیادہ تر بغیر پائلٹ ریپر ڈرونز کو نشانہ بنایا ہے۔ ان میں سے نو ڈرونز فضا میں مار گرائے گئے جبکہ ایک ڈرون اردن میں ایک ایئر فیلڈ پر بیلسٹک میزائل حملے میں تباہ ہوا۔ دو دیگر ڈرونز حادثات کا شکار ہوئے۔
ماہرین کا کہنا ہے کہ ریپر ڈرونز کو عموماً خطرناک علاقوں میں استعمال کیا جاتا ہے کیونکہ یہ بغیر پائلٹ ہوتے ہیں اور نسبتاً کم لاگت میں تیار کیے جا سکتے ہیں۔
رپورٹ میں ماضی کی کارروائیوں کا حوالہ دیتے ہوئے بتایا گیا کہ 2011 میں لیبیا میں امریکی مداخلت کے دوران چار ماہ میں صرف تین فضائی نقصانات رپورٹ ہوئے تھے۔ ماہرین کے مطابق موجودہ صورتحال میں فضائی آپریشنز کے پھیلاؤ اور روزانہ کی بنیاد پر زیادہ مشنز کی وجہ سے نقصانات کی شرح میں اضافہ ہوا ہے۔
امریکی سینٹرل کمانڈ نے اس حوالے سے کوئی تبصرہ کرنے سے گریز کیا ہے اور کہا ہے کہ وہ جنگی نقصانات کی تفصیلات عام نہیں کرتے۔