مساجد کے باہر گداگری اور سامان فروخت پر پابندی عائد

اسلام آباد پولیس نے وفاقی دارالحکومت کی مساجد کی انتظامیہ کو سکیورٹی کے حوالے سے ہدایات جاری کی ہیں۔
پولیس نے کہا ہے کہ عبادت کے دوران ہر مسجد میں کم از کم ایک مسلح سکیورٹی گارڈ موجود ہونا چاہیے، اور گارڈ کو مسجد کی حدود میں اسلحہ رکھنے کی اجازت ہوگی۔
ہدایات کے مطابق، مسجد کے داخلی اور خارجی راستے اور ارد گرد کی پارکنگ میں داخلے پر پابندی ہوگی، اور مسجد میں داخل ہونے اور نکلنے کے لیے ایک ہی راستہ استعمال کیا جائے گا۔
مزید یہ کہ، مساجد کے مین گیٹ کے باہر ریڑھی بان، گداگر، ٹوپیاں یا دیگر اشیاء کی فروخت ممنوع ہوگی۔ کسی بھی مشکوک شخص، سرگرمی یا سامان کی اطلاع فوری طور پر پولیس کو دی جائے۔
پولیس نے مساجد اور امام بارگاہوں کی انتظامیہ سے کہا ہے کہ وہ تمام ہدایات پر فوری عمل کریں، اور کسی بھی خلاف ورزی کی صورت میں قانونی کارروائی کی جائے گی۔