ورلڈ کپ سے پہلے بنگلہ دیش کا بڑا قدم

ٹی ٹوئنٹی ورلڈ کپ 2026 سے پہلے بھارت، پاکستان اور بنگلہ دیش کے درمیان پیدا ہونے والی کشیدگی کے تناظر میں انٹرنیشنل کرکٹ کونسل (آئی سی سی) نے اہم اقدام اٹھاتے ہوئے ایشیا کی پانچ بڑی کرکٹ کھیلنے والی قوموں کے سربراہان کو باہمی مذاکرات کے لیے مدعو کر لیا ہے۔
بنگلہ دیش کرکٹ بورڈ (بی سی بی) کے صدر امین الاسلام کے مطابق یہ ملاقات کولمبو میں 15 تاریخ کو ہونے والے پاک بھارت میچ کے موقع پر سائیڈ لائنز پر منعقد ہوگی۔ اجلاس کا مقصد خطے میں کرکٹ تعلقات کو بہتر بنانا اور ورلڈ کپ سے قبل پیدا ہونے والی کشیدگی کو کم کرنا ہے۔
بی سی بی صدر کا کہنا ہے کہ آئی سی سی چاہتا ہے کہ پاکستان، بھارت، بنگلہ دیش سمیت دیگر اہم ایشیائی ممالک کے نمائندے ایک ساتھ بیٹھ کر میچ دیکھیں اور مثبت ماحول میں بات چیت کے ذریعے مسائل کا حل تلاش کریں۔ ان کے بقول یہ قدم کرکٹ سفارتکاری کو فروغ دینے کی جانب ایک مثبت پیش رفت ہے۔
ذرائع کے مطابق پاکستان نے ابتدائی طور پر بھارت کے خلاف گروپ مرحلے کے میچ کے بائیکاٹ پر غور کیا تھا، تاہم بعد ازاں اس فیصلے پر نظرثانی کی گئی۔ امین الاسلام نے بتایا کہ انہوں نے پاکستان کرکٹ بورڈ کے چیئرمین سے رابطہ کر کے ممکنہ مالی اثرات اور عالمی کرکٹ پر پڑنے والے منفی نتائج سے آگاہ کیا، جس کے بعد صورتحال میں بہتری آئی۔
واضح رہے کہ پاک بھارت مقابلہ عالمی کرکٹ کے سب سے زیادہ منافع بخش میچوں میں شمار ہوتا ہے، جس سے کروڑوں ڈالر کا براڈکاسٹ ریونیو حاصل ہوتا ہے۔ ماہرین کے مطابق اگر یہ میچ نہ ہوتا تو اس کے مالی اثرات تمام رکن ممالک پر پڑ سکتے تھے۔
آئی سی سی کی جانب سے اس اعلیٰ سطحی اجلاس کو خطے میں کرکٹ کے استحکام اور باہمی تعاون کے فروغ کی کوشش کے طور پر دیکھا جا رہا ہے، جبکہ شائقین کو امید ہے کہ کھیل کے ذریعے تعلقات میں بہتری کی راہ ہموار ہوگی۔