امریکہ کی ثالثی سے تھائی لینڈ اور کمبوڈیا میں جنگ بندی

امریکی صدر ڈونلڈ ٹرمپ نے اعلان کیا ہے کہ تھائی لینڈ اور کمبوڈیا کے درمیان تنازع ختم ہو گیا ہے اور دونوں ممالک اب امن کے راستے پر واپس جائیں گے۔ صدر نے کہا کہ انہوں نے گزشتہ 11 ماہ میں 8 جنگیں رکوائی ہیں اور امریکہ عالمی امن میں ایک اہم کردار ادا کر رہا ہے۔
صدر ٹرمپ نے دونوں ممالک کے رہنماؤں کی فوری فیصلے کرنے کی صلاحیت کی تعریف کی اور کہا کہ امریکہ ایسے مواقع پر مدد فراہم کرنے پر فخر محسوس کرتا ہے۔ انہوں نے اقوام متحدہ پر تنقید کرتے ہوئے کہا کہ یہ تنظیم اکثر تنازعات میں محدود کردار ادا کرتی ہے اور عالمی امن کے لیے زیادہ فعال ہونا چاہیے۔
یاد رہے کہ گزشتہ ماہ تھائی لینڈ نے کمبوڈیا کے ساتھ امن معاہدے پر عملدرآمد روک دیا تھا، جب سرحد کے قریب ایک بارودی سرنگ دھماکے میں دو فوجی زخمی ہو گئے تھے۔ یہ معاہدہ جولائی میں ہونے والی سرحدی جھڑپوں کے بعد امن قائم کرنے کے لیے طے پایا تھا، جن میں 40 سے زیادہ افراد ہلاک اور لاکھوں لوگ بے گھر ہوئے تھے۔
دونوں ممالک نے اکتوبر میں ملائیشیا میں ایک تقریب میں معاہدے پر دستخط کیے تھے، جس میں امریکی صدر بھی موجود تھے، مگر تھائی لینڈ نے اس پر مکمل عملدرآمد میں تاخیر کی تھی۔