گوگل میپس کے چند کارآمد فیچرز جو آپ کو استعمال کرنے چاہئیں

زیادہ تر لوگ گوگل میپس کو صرف راستہ معلوم کرنے کے لیے استعمال کرتے ہیں، لیکن یہ ایپ اس سے کہیں زیادہ سہولیات فراہم کرتی ہے۔ یہ نہ صرف آپ کو اپنے اردگرد کی دنیا کے بارے میں معلومات دیتی ہے بلکہ آپ کی ٹریول اور لوکیشن مینجمنٹ کو بھی آسان بناتی ہے۔

پسندیدہ مقامات کو سیو کریں

گوگل میپس پر آپ اپنے پسندیدہ مقامات کو اسٹار یا سیو کر سکتے ہیں۔ چاہے آپ نئے شہر میں ہوں یا اپنے شہر میں مشہور مقامات تلاش کر رہے ہوں، یہ فیچر آپ کو دوبارہ وزٹ کے لیے آسان رسائی دیتا ہے۔ گوگل میپس کی ہسٹری کے مطابق بھی آپ کے لیے تجاویز فراہم کی جاتی ہیں۔

ٹریول ٹائم لائن استعمال کریں

یہ فیچر آپ کو دکھاتا ہے کہ آپ ماضی میں کہاں کہاں گئے ہیں۔ یہ خودکار طور پر آپ کے روٹس محفوظ کرتا ہے اور آپ کسی بھی وقت اپنے سفر کی تاریخ دیکھ سکتے ہیں۔ اس کا فائدہ یہ ہے کہ اگر فون کھو جائے یا نیا ڈیوائس استعمال کریں تو آپ کا ڈیٹا برقرار رہتا ہے۔

ون ٹچ نیوی گیشن سے ٹرپس سیو کریں

گوگل میپس میں اگر کسی مقام کے متعدد راستے دستیاب ہوں تو آپ اپنی پسند کا راستہ منتخب کرکے اسے محفوظ کر سکتے ہیں۔ آئندہ اسی مقام پر جانے کے لیے ایپ اسی محفوظ راستے کو ظاہر کرے گی۔

لیئرز کا استعمال

گوگل میپس میں مختلف لیئرز دستیاب ہیں جو علاقوں کے بارے میں معلومات دیتی ہیں۔ سبز رنگ میدان یا جنگلات کو، نیلا رنگ پانی کو ظاہر کرتا ہے۔ ٹریفک لیئر حقیقی وقت میں جام یا ٹریفک کی صورتحال بتاتی ہے، جبکہ پبلک ٹرانزٹ لیئر بس یا ٹرین کے راستے دکھاتی ہے۔

اردگرد موجود سہولیات دریافت کریں

اگر آپ ATM، اسپتال یا الیکٹرک گاڑی چارجنگ اسٹیشن تلاش کر رہے ہیں تو گوگل میپس میں مخصوص کیٹیگریز کے شارٹ کٹ موجود ہیں۔ اس سے آپ فوری طور پر اپنے قریب موجود سہولیات دیکھ سکتے ہیں۔

گلانس ایبل ڈائریکشنز فیچر

یہ فیچر آپ کو نیوی گیشن کے دوران فون کی بیٹری بچانے میں مدد دیتا ہے۔ آپ کو ایپ کھولنے یا فون ان لاک کرنے کی ضرورت نہیں، راستے کی معلومات لاک اسکرین پر نوٹیفیکیشن کے ذریعے آتی رہتی ہیں۔ اگر راستہ بدلیں تو یہ خودکار اپ ڈیٹ بھی فراہم کرتا ہے۔

گوگل میپس کے یہ فیچرز آپ کے سفر اور روزمرہ کی ضروریات کو زیادہ آسان اور موثر بنا سکتے ہیں۔