گوگل کروم کابڑا ری ڈیزائن: اب پہلے سے زیادہ اسمارٹ اور طاقتور

19 گوگل نے اپنے مقبول ویب براؤزر کروم کو ایک دہائی سے زائد عرصے بعد مکمل طور پر ری ڈیزائن کر دیا ہے، جس میں آرٹیفیشل انٹیلیجنس کی مدد سے کئی جدید فیچرز شامل کیے گئے ہیں۔

کروم میں اب اےآئی موڈ متعارف کرایا گیا ہے، جو صارفین کو طویل اور پیچیدہ سوالات کے جوابات براہ راست ایڈریس بار میں فراہم کرے گا۔ اس کی بدولت صارفین ویب پیج سے نکلے بغیر معلومات حاصل کر سکیں گے یا مواد کی سمری پڑھ سکیں گے۔

جیمنائی اسسٹنٹ کی شمولیت

گوگل نے اپنا اےآئی اسسٹنٹ جیمنائی بھی کروم میں شامل کر دیا ہے، جو اب تمام صارفین کے لیے مفت دستیاب ہوگا۔ جیمنائی کی مدد سے:

ویب پیجز کو پڑھا اور سمجھا جا سکتا ہے

مختلف ٹیبز کی معلومات کا موازنہ کیا جا سکتا ہے

حالیہ دیکھی گئی ویب سائٹس کو تلاش کرنا آسان ہو جائے گا

صارف صرف ہدایت دے کر اپنی مطلوبہ ویب سائٹس دوبارہ اوپن کر سکیں گے، بغیر ہسٹری میں تلاش کیے۔

ٹیبز اور براؤزنگ کا نیا انداز

کروم میں ایک اور اہم اپڈیٹ ملٹی ٹیب سپورٹ ہے، جس کے تحت جیمنائی ایک ساتھ کئی صفحات سے معلومات جمع کرکے ایک جامع سمری فراہم کرے گا۔ یہ فیچر خاص طور پر ان افراد کے لیے مفید ہوگا جو مختلف آپشنز یا مصنوعات کا موازنہ کرنا چاہتے ہیں۔

سیکیورٹی اور پاس ورڈ منیجمنٹ میں بہتری

گوگل نے کروم کی سیکیورٹی کو بھی اےآئی کی مدد سے بہتر بنایا ہے۔ جیمنائی نانو نامی ٹیکنالوجی اب براؤزنگ کے دوران صارفین کو مشکوک سائٹس اور اسکیمز سے خبردار کرے گی۔

اس کے علاوہ، کروم بہت جلد صارفین کو ایک کلک سے پاس ورڈ تبدیل کرنے کی سہولت بھی فراہم کرے گا، خاص طور پر اُن سائٹس پر جن کے پاس ورڈ لیک ہونے کا خطرہ ہو۔

دستیابی

یہ جدید فیچرز فی الحال امریکا میں منتخب صارفین کے لیے دستیاب ہیں، تاہم گوگل نے اعلان کیا ہے کہ جلد ہی یہ دیگر ممالک اور زبانوں میں بھی پیش کیے جائیں گے۔ موبائل صارفین (اینڈرائیڈ و آئی او ایس) کے لیے سپورٹ پر بھی کام جاری ہے۔