بریگیڈئیر جنرل شریفل ایم خان “گولڈن ڈوم” منصوبے کے نئے ڈائریکٹر آف اسٹاف مقرر

امریکی ایئر فورس کے بریگیڈئیر جنرل شریفل ایم خان کو جدید میزائل دفاعی نظام پر مبنی “گولڈن ڈوم” منصوبے کا ڈائریکٹر آف اسٹاف مقرر کر دیا گیا ہے۔ اس تقرری کے ساتھ ہی وہ اس اہم عہدے پر پہنچنے والے پہلے مسلمان اور بنگلہ دیشی نژاد افسر بن گئے ہیں۔

“گولڈن ڈوم” منصوبہ، جو امریکا کے میزائل دفاعی پروگرام کا اہم حصہ ہے، جدید ترین ٹیکنالوجی پر مبنی سسٹمز کی تیاری، تنصیب اور حکمت عملی سے متعلق ہے۔ اس کا مقصد امریکی دفاعی صلاحیتوں کو مزید مضبوط بنانا ہے۔

بریگیڈئیر جنرل خان کا فوجی کیریئر 1997 میں یو ایس ایئر فورس اکیڈمی سے فارغ التحصیل ہونے کے بعد شروع ہوا۔ وہ اسپیس سسٹمز، سیٹلائٹ آپریشنز اور قومی سطح کے دفاعی مشنز میں وسیع تجربہ رکھتے ہیں۔ انہیں مشرق وسطیٰ میں دو مرتبہ خدمات انجام دینے کا موقع ملا ہے، جہاں ان کی کارکردگی پر متعدد اعلیٰ عسکری اعزازات سے نوازا گیا۔

بطور ڈائریکٹر آف اسٹاف، جنرل خان کا کردار “گولڈن ڈوم” منصوبے کی پالیسی سازی، عمل درآمد اور شراکت داریوں کی نگرانی کرنا ہوگا، جس میں امریکی صنعت، یونیورسٹیاں، نیشنل لیبارٹریز اور حکومتی ادارے شامل ہیں۔

یہ تقرری نہ صرف ان کے تجربے کا اعتراف ہے بلکہ امریکی فوج میں تنوع اور شمولیت کے بڑھتے رجحان کی بھی عکاسی کرتی ہے۔