خیبر پختونخوا میں غیر قانونی کان کنی کے خلاف کارروائی، تمام لائسنس منسوخ کرنے کا اعلان

پشاور: گورنر خیبر پختونخوا فیصل کریم کنڈی نے صوبے میں غیر قانونی کان کنی کے خلاف سخت اقدامات کا اعلان کرتے ہوئے سونے سمیت دیگر معدنیات کی کان کنی کے تمام لائسنس منسوخ کرنے کا دعویٰ کیا ہے۔

پشاور میں پریس کانفرنس کرتے ہوئے فیصل کریم کنڈی نے الزام عائد کیا کہ صوبے میں غیر قانونی کان کنی کے معاملات میں 12 سیاسی شخصیات ملوث ہیں، جن میں شہریار آفریدی، آفتاب عالم اور وزیر اعلیٰ سہیل آفریدی کے بھائی کا نام بھی شامل ہے۔

گورنر کے مطابق صوبے میں غیر قانونی کان کنی کے ذریعے ہر ماہ تقریباً 90 کلو گرام سونا نکالا جا رہا تھا، جس کی مالیت اربوں روپے بتائی گئی ہے۔ ان کا دعویٰ تھا کہ نکالا جانے والا سونا افغانستان منتقل کیا جاتا تھا اور اس رقم کو دہشت گردی کے لیے استعمال کیے جانے کا خدشہ تھا۔

فیصل کریم کنڈی نے مزید الزام لگایا کہ غیر قانونی کان کنی میں ملوث عناصر کالعدم دہشت گرد تنظیم فتنتہ الخوارج کو بھتہ بھی ادا کرتے تھے۔ ان کے بقول صوبے میں غیر قانونی کان کنی کا ماہانہ حجم تقریباً 4 ارب 92 کروڑ روپے تھا۔

انہوں نے کان کنی کے ٹھیکیداروں کو ایک ہفتے کی مہلت دیتے ہوئے ہدایت کی کہ وہ اپنی مشینری متعلقہ علاقوں سے ہٹا لیں، بصورت دیگر مقررہ مدت کے بعد مشینری ضبط کرنے سمیت سخت قانونی کارروائی کی جائے گی۔

گورنر خیبر پختونخوا نے کہا کہ غیر قانونی کان کنی کے مراکز کے خلاف کارروائیاں مزید تیز کی جائیں گی اور اس کاروبار میں ملوث کسی بھی شخص کو رعایت نہیں دی جائے گی۔

ان کا کہنا تھا کہ صوبے کے معدنی ذخائر عوام کی ملکیت ہیں اور ان وسائل کو قانونی، شفاف اور منظم طریقے سے استعمال میں لانا حکومت کی ذمہ داری ہے۔

فیصل کریم کنڈی نے گزشتہ 13 برس کے دوران صوبائی وسائل کے مبینہ غیر قانونی استعمال پر بھی تنقید کرتے ہوئے کہا کہ اب اقربا پروری کے بجائے قانون کے مطابق احتساب کو یقینی بنایا جائے گا۔

انہوں نے مزید کہا کہ خیبر پختونخوا میں امن و امان کا قیام اولین ترجیح ہے اور دہشت گردی کے خلاف جنگ میں کامیابی کے لیے تمام ریاستی اداروں کو مل کر کام کرنا ہوگا۔

واضح رہے کہ سیاسی شخصیات کے خلاف ملوث ہونے کے الزامات اور غیر قانونی کان کنی سے متعلق اعداد و شمار گورنر کے پریس کانفرنس میں کیے گئے دعووں پر مبنی ہیں، جن کی آزادانہ تصدیق ضروری ہے۔