پاکستانی شہریوں کے لیے 11 مقامات پر ویزا فری انٹری

اسلام آباد: (ویب ڈیسک) موسم سرما کی تعطیلات میں بیرون ملک سفر کا ارادہ رکھنے والے پاکستانی شہریوں کے لیے اچھی خبر ہے کہ دنیا کے 29 مقامات ایسے ہیں جہاں پاکستانی پاسپورٹ پر روایتی ویزا پہلے سے حاصل کیے بغیر سفر ممکن ہے۔ ان مقامات میں ویزا فری انٹری، ویزا آن ارائیول اور الیکٹرانک ٹریول اتھارائزیشن کی سہولتیں شامل ہیں۔

ہینلے پاسپورٹ انڈیکس کی تازہ درجہ بندی کے مطابق پاکستانی شہریوں کو 11 مقامات پر بغیر ویزا داخلے کی سہولت حاصل ہے، جبکہ 15 مقامات پر پہنچنے کے بعد ویزا جاری کیا جاتا ہے۔ اس کے علاوہ تین مقامات کے لیے الیکٹرانک سفری اجازت نامہ حاصل کرنا ضروری ہے۔

پاکستانی شہریوں کے لیے 11 ویزا فری مقامات

ہینلے انڈیکس میں شامل ویزا فری مقامات میں بارباڈوس، کک آئی لینڈز، ڈومینیکا، ہیٹی، مائیکرونیشیا، مونٹسیراٹ، روانڈا، سینٹ ونسنٹ اینڈ دی گریناڈائنز، گیمبیا، ٹرینیڈاڈ اینڈ ٹوباگو اور وانواتو شامل ہیں۔

یہ ممالک مختلف براعظموں اور خطوں میں واقع ہیں اور پاکستانی سیاحوں کو پیشگی ویزا درخواست کے بغیر سفر کا موقع فراہم کرتے ہیں۔ تاہم داخلے کے وقت امیگریشن حکام کی شرائط پوری کرنا لازمی ہے۔

15 ممالک جہاں پہنچ کر ویزا حاصل کیا جا سکتا ہے

پاکستانی پاسپورٹ رکھنے والے شہری برونڈی، کمبوڈیا، کوموروس، جبوتی، گنی بساؤ، مڈغاسکر، مالدیپ، نیپال، نیوئے، پلاؤ، ساموا، سینیگال، سیرا لیون، مشرقی تیمور اور تووالو میں ویزا آن ارائیول کی سہولت سے فائدہ اٹھا سکتے ہیں۔

اس طریقہ کار میں مسافر کو متعلقہ ملک پہنچنے پر ایئرپورٹ یا مقررہ سرحدی مقام سے ویزا جاری کیا جاتا ہے۔ مختلف ممالک میں ویزا فیس اور قیام کی مدت الگ الگ ہو سکتی ہے۔

تین مقامات کے لیے الیکٹرانک اجازت نامہ

ہینلے انڈیکس کے مطابق کینیا، سیشلز اور سری لنکا کے سفر کے لیے پاکستانی شہریوں کو الیکٹرانک ٹریول اتھارائزیشن (ای ٹی اے) حاصل کرنا ہوتی ہے، جس کی منظوری سفر سے پہلے آن لائن لینا ضروری ہے۔

قطر، عمان اور سعودی عرب کی سفری سہولتیں

قطر پاکستانی شہریوں کو شرائط پوری کرنے پر 30 روزہ سیاحتی ویزا آن ارائیول فراہم کرتا ہے۔ اس کے لیے ڈسکور قطر کے ذریعے ہوٹل بکنگ اور کم از کم ایک ماہ کی ہیلتھ انشورنس درکار ہے۔

دوسری جانب عمان اور سعودی عرب کے ساتھ پاکستان کے ویزا استثنیٰ کے معاہدے عام سیاحوں کے لیے نہیں بلکہ مخصوص سرکاری، سفارتی اور خصوصی پاسپورٹ رکھنے والے افراد کے لیے ہیں۔

سفر سے پہلے ضروری احتیاط

ماہرین کے مطابق بیرون ملک روانگی سے قبل پاسپورٹ کی معیاد، واپسی کا ٹکٹ، ہوٹل بکنگ، سفری انشورنس اور متعلقہ ملک کے امیگریشن قوانین کی جانچ ضروری ہے۔

واضح رہے کہ ویزا پالیسیوں میں تبدیلی ممکن ہے، اس لیے ٹکٹ اور رہائش کی بکنگ سے پہلے متعلقہ ملک کی سرکاری ویب سائٹ یا سفارت خانے سے تازہ ترین معلومات حاصل کرنا بہتر ہے۔ ویزا فری سہولت بھی کسی مسافر کے داخلے کی حتمی ضمانت نہیں ہوتی۔