قطری وزیراعظم کا غزہ جنگ پر سخت مؤقف، نیتن یاہو کو جنگی جرائم کا ذمہ دار قرار دے دیا

قطری وزیراعظم کا غزہ جنگ پر سخت مؤقف، نیتن یاہو کو جنگی جرائم کا ذمہ دار قرار دے دیا

قطر کے وزیراعظم اور وزیر خارجہ شیخ محمد بن عبدالرحمن آل ثانی نے غزہ میں اسرائیلی کارروائیوں پر شدید تنقید کرتے ہوئے کہا ہے کہ وہاں ہونے والی کارروائیاں جنگی جرائم کے زمرے میں آتی ہیں۔

برطانوی صحافی پیئرز مورگن کو دیے گئے ایک انٹرویو میں قطری وزیراعظم کا کہنا تھا کہ غزہ میں جنگی جرائم کے ذمہ دار افراد کو اس کی ذمہ داری قبول کرنا ہوگی۔ انہوں نے اسرائیلی وزیراعظم بینجمن نیتن یاہو سمیت ایسے تمام افراد کو جنگی جرائم کا ذمہ دار قرار دیا جن کے بارے میں ان کا کہنا تھا کہ وہ ان کارروائیوں میں ملوث ہیں۔

شیخ محمد بن عبدالرحمن آل ثانی نے غزہ میں اسپتالوں اور اسکولوں کو نشانہ بنائے جانے کے الزامات کا بھی ذکر کیا اور کہا کہ کسی بھی جواز کے تحت شہری تنصیبات کو نشانہ بنانے کی کارروائیوں کا دفاع نہیں کیا جا سکتا۔

قطری وزیراعظم نے حماس کی عسکری سرگرمیوں کی مالی معاونت سے متعلق الزامات کو بھی مسترد کیا۔ ان کے مطابق قطر کے خلاف ہونے والی مہم کا مقصد غزہ کے معاملے میں ثالث کے طور پر قطر کے کردار کو کمزور کرنا تھا۔

قطر غزہ کے تنازع میں جنگ بندی اور قیدیوں کے تبادلے سمیت مختلف معاملات پر ثالثی کی کوششوں میں شامل رہا ہے۔