سونا اچانک ہزاروں روپے سستا، فی تولہ قیمت کہاں پہنچ گئی؟

پاکستان میں سونے کی قیمت میں ایک بار پھر نمایاں کمی سامنے آئی ہے، جس کے بعد فی تولہ سونا 3 ہزار 600 روپے سستا ہوگیا۔

صرافہ مارکیٹ کے تازہ نرخوں کے مطابق کمی کے بعد ایک تولہ سونے کی قیمت 4 لاکھ 65 ہزار 536 روپے ہوگئی ہے۔ اسی طرح 10 گرام سونے کی قیمت میں بھی 3 ہزار 86 روپے کی کمی ریکارڈ کی گئی، جس کے بعد اس کی نئی قیمت 3 لاکھ 99 ہزار 122 روپے مقرر ہوئی۔

عالمی مارکیٹ میں بھی سونے کے نرخ دباؤ کا شکار رہے۔ بین الاقوامی سطح پر فی اونس سونے کی قیمت میں تقریباً 36 ڈالر کی کمی ہوئی، جس کے بعد یہ 4 ہزار 430 ڈالر فی اونس کی سطح پر آگئی۔

گزشتہ چند روز کے دوران پاکستان میں سونے کی قیمتوں میں غیر معمولی اتار چڑھاؤ دیکھنے میں آیا ہے۔ 3 ستمبر کو فی تولہ سونے کی قیمت میں 11 ہزار 200 روپے کا اضافہ ہوا تھا، جبکہ اس سے ایک روز قبل 2 ستمبر کو قیمت میں 11 ہزار 300 روپے کی بڑی کمی ریکارڈ کی گئی تھی۔

اس سے قبل 31 اگست کو بھی فی تولہ سونا 1800 روپے سستا ہوا تھا، جبکہ 29 اگست کو قیمت میں 15 ہزار 100 روپے کی نمایاں کمی ہوئی تھی۔

ماہرین کے مطابق عالمی مارکیٹ میں سونے کی قیمت کئی عوامل سے متاثر ہوتی ہے، جن میں امریکی ڈالر کی قدر، عالمی شرح سود سے متعلق توقعات، معاشی حالات اور جغرافیائی سیاسی صورتحال اہم ہیں۔ عالمی نرخوں میں تبدیلی کا براہِ راست اثر پاکستان کی مقامی صرافہ مارکیٹ پر بھی پڑتا ہے، جس کے باعث سونے کی قیمتوں میں مسلسل اتار چڑھاؤ دیکھا جا رہا ہے۔