تاپسی پنو کا نئے انداز کے کرداروں پر فوکس، روایتی رولز سے گریز کا فیصلہ

ممبئی: بالی ووڈ اداکارہ تاپسی پنو نے اپنے مستقبل کے فلمی منصوبوں کے حوالے سے کہا ہے کہ وہ ایک جیسے کردار بار بار ادا کرنے کے بجائے مختلف اور غیر متوقع کرداروں میں نظر آنا چاہتی ہیں۔

ایک حالیہ انٹرویو میں اداکارہ نے بتایا کہ وہ فلم سازوں سے یہ بات واضح طور پر کہتی ہیں کہ انہیں ایسے کردار نہ دیے جائیں جن کی کہانی اور انجام کا اندازہ ناظرین فلم شروع ہوتے ہی لگا سکیں۔

تاپسی کے مطابق کسی اداکار کے لیے مسلسل ایک ہی نوعیت کے کردار ادا کرنا دلچسپی کم کر سکتا ہے، جبکہ ناظرین بھی ایک جیسے کردار دیکھ کر جلد اکتا سکتے ہیں۔ ان کا کہنا تھا کہ فلمی دنیا میں اداکاراؤں کو اکثر ان کی سابقہ اسکرین امیج کی بنیاد پر مخصوص کرداروں تک محدود کردیا جاتا ہے۔

اداکارہ نے مثال دیتے ہوئے کہا کہ بعض فنکاراؤں کو زیادہ تر گلیمرس کرداروں کے لیے موزوں سمجھا جاتا ہے، جبکہ کچھ اداکاراؤں کو سنجیدہ یا سماجی موضوعات پر بننے والی فلموں کے لیے مخصوص کردیا جاتا ہے۔ ان کے خیال میں اس طرح کی کاسٹنگ کسی فنکار کے لیے اپنی صلاحیتوں کے نئے پہلو سامنے لانے میں رکاوٹ بن سکتی ہے۔

تاپسی نے بتایا کہ انہوں نے ماضی میں بعض ایسے فلمی منصوبوں سے خود کو الگ کیا جن میں انہیں لگا کہ کردار ان کی پہلے سے قائم شناخت کو ہی دہراتا ہے۔

اداکارہ کا کہنا ہے کہ کیریئر کے ابتدائی مرحلے میں انہیں روایتی ہیروئن کے کردار زیادہ نہیں ملے، جس کے باعث انہوں نے نسبتاً مختلف اور مضبوط کرداروں کو ترجیح دی۔ وقت گزرنے کے ساتھ یہی انتخاب ان کی اداکاری کی شناخت بن گئے۔

تاہم اب تاپسی صرف سنجیدہ اور سماجی موضوعات پر مبنی فلموں تک محدود نہیں رہنا چاہتیں۔ وہ ہلکے پھلکے، مزاحیہ اور تفریحی منصوبوں میں بھی اپنی صلاحیتیں آزمانے کی خواہش رکھتی ہیں۔ 2024 کی فلم ’کھیل کھیل میں‘ بھی اسی سمت میں ان کی ایک نمایاں کوشش تھی۔

اداکارہ کی نئی فلم ’گاندھاری‘ بھی ان کے مختلف انداز کی عکاسی کرتی ہے۔ فلم میں وہ ایک ایسی ماں کا کردار نبھا رہی ہیں جو اپنی اغوا شدہ بیٹی کی تلاش میں خطرناک حالات کا سامنا کرتی ہے۔

’گاندھاری‘ 3 ستمبر کو نیٹ فلکس پر پیش کی جائے گی۔ فلم کی ریلیز سے قبل تاپسی کے بیانات سے ظاہر ہوتا ہے کہ وہ آنے والے وقت میں اپنی اداکاری کے مزید نئے پہلو ناظرین کے سامنے لانے کا ارادہ رکھتی ہیں۔