گوگل کا جیمنائی صارفین کے لیے نیا فیچر متعارف

گوگل نے اپنے مصنوعی ذہانت کے پلیٹ فارم جیمنائی سے تیار ہونے والی تصاویر اور ویڈیوز کے حوالے سے صارفین کے لیے ایک نئی سہولت متعارف کرانے کا فیصلہ کیا ہے۔ اس فیچر کے ذریعے بعض صارفین اے آئی سے تیار کردہ مواد پر نظر آنے والے واٹر مارک کو ہٹا سکیں گے۔

یہ نیا آپشن جیمنائی کے علاوہ گوگل کے فلو پلیٹ فارم اور سرچ کے اے آئی موڈ میں بھی فراہم کیا جا رہا ہے۔ صارفین سیٹنگز کے ذریعے تیار کردہ تصاویر میں موجود نمایاں واٹر مارک ختم کر سکیں گے، جبکہ جیمنائی اومنی سے بنائی گئی ویڈیوز کے لیے بھی یہی سہولت دستیاب ہوگی۔

تاہم یہ فیچر ہر ملک میں دستیاب نہیں ہوگا۔ جن ممالک میں اے آئی سے تیار کردہ مواد پر واضح واٹر مارک برقرار رکھنے سے متعلق قوانین موجود ہیں، وہاں صارفین کو اسے ہٹانے کا اختیار نہیں دیا جائے گا۔

گوگل کے مطابق واٹر مارک ہٹانے کے باوجود اے آئی سے تیار کردہ تصویر یا ویڈیو میں موجود پوشیدہ ڈیجیٹل شناخت برقرار رہے گی۔ اس کا مقصد یہ ہے کہ مواد سے نمایاں نشان ہٹنے کے باوجود اس کی اے آئی سے تخلیق ہونے کی شناخت ممکن رہے۔

یہ اقدام جیمنائی کے ذریعے تیار ہونے والے بصری مواد کو صارفین کے لیے مزید لچکدار بنانے کی جانب ایک اہم پیش رفت قرار دیا جا رہا ہے۔