گوگل کروم کا اے آئی موڈ مزید اسمارٹ، نئی سہولیات شامل

گوگل نے اپنے ویب براؤزر گوگل کروم میں مصنوعی ذہانت (اے آئی) سے متعلق مزید بہتریاں متعارف کرانے کا اعلان کیا ہے، جن کا مقصد صارفین کے لیے براؤزنگ اور ریسرچ کو زیادہ آسان اور مؤثر بنانا ہے۔
حالیہ اپڈیٹس میں پہلے ہی کچھ نمایاں فیچرز شامل کیے جا چکے ہیں، جیسے ورٹیکل ٹیبز اور نیا ریڈنگ موڈ۔ اب کمپنی اے آئی موڈ کو مزید بہتر بناتے ہوئے تین نئے سرچ فیچرز متعارف کرا رہی ہے، جنہیں ابتدائی طور پر امریکا میں پیش کیا جا رہا ہے۔
پہلا فیچر “سائیڈ بائی سائیڈ سرچ” ہے، جس کے ذریعے صارفین کسی بھی ویب پیج کو اے آئی موڈ میں ساتھ ساتھ (سائیڈ ویو) کھول سکیں گے۔ اس سہولت سے ملتی جلتی ویب سائٹس کا موازنہ کرنا، معلومات کا تفصیلی جائزہ لینا اور اے آئی اسسٹنٹ (جیمنائی) سے براہ راست سوالات کرنا آسان ہو جائے گا۔
دوسرا فیچر “آل ٹیبز سرچ” ہے، جو صارفین کو مختلف ٹیبز، تصاویر اور فائلز (مثلاً پی ڈی ایف) میں بیک وقت تلاش کرنے کی سہولت دیتا ہے۔ صارف کسی ٹیب کو منتخب کر کے اسے اے آئی موڈ میں شامل کر سکتا ہے، جس کے بعد سسٹم مزید متعلقہ ویب سائٹس تجویز کرے گا یا سوالات کے جوابات فراہم کرے گا۔
تیسرا فیچر “ملٹی اِن پٹ” کہلاتا ہے، جس کے ذریعے مختلف ٹولز تک رسائی ممکن ہو جاتی ہے، جیسے کہ ڈیزائن پلیٹ فارمز۔ اس کے ذریعے صارفین اے آئی موڈ میں تصاویر کو ایڈٹ کرنے یا نئی تصاویر تخلیق کرنے کی سہولت بھی حاصل کر سکیں گے۔
یہ تمام نئے فیچرز اس مقصد کے تحت متعارف کرائے جا رہے ہیں کہ صارفین کو ایک ہی جگہ پر زیادہ جامع، تیز اور ذہین براؤزنگ کا تجربہ فراہم کیا جا سکے۔