کیٹی پیری اور جسٹن ٹروڈو ایک ساتھ تقریب میں شریک، افواہوں کو نئی ہوا مل گئی

امریکی گلوکارہ کیٹی پیری اور کینیڈا کے سابق وزیرِ اعظم جسٹن ٹروڈو نے نیویارک میں منعقد ہونے والے ٹریبیکا فیسٹیول میں ایک ساتھ شرکت کی، جس کے بعد سوشل میڈیا پر ان کے تعلق سے متعلق قیاس آرائیوں میں ایک بار پھر اضافہ ہوگیا۔

رپورٹس کے مطابق دونوں شخصیات 8 جون کو کیٹی پیری کی نئی دستاویزی فلم ’’کیٹی پیری: دی لائف ٹائمز ٹور، لائیو فرام پیرس‘‘ کے پریمیئر میں ایک ساتھ نظر آئیں۔ تقریب کے دوران دونوں نے ریڈ کارپٹ پر تصاویر بنوائیں اور حاضرین سے ملاقات بھی کی۔

اس موقع پر کیٹی پیری اپنی نئی دستاویزی فلم کی تشہیری سرگرمیوں میں مصروف رہیں جبکہ جسٹن ٹروڈو بھی تقریب کے دوران ان کے ہمراہ دکھائی دیے۔ سوشل میڈیا صارفین نے دونوں کی مشترکہ تصاویر اور ویڈیوز پر مختلف تبصرے کیے، تاہم دونوں شخصیات کی جانب سے اپنے تعلق کی نوعیت کے بارے میں کوئی باضابطہ بیان سامنے نہیں آیا۔

کیٹی پیری کی یہ دستاویزی فلم نومبر 2025 میں پیرس میں ہونے والے کنسرٹس پر مبنی ہے، جس کی ہدایت کاری پال ڈگڈیل نے کی ہے۔ فلم کو جدید فلم سازی کی تکنیک کے ذریعے متعدد کیمروں سے ریکارڈ کیا گیا ہے۔

یاد رہے کہ کیٹی پیری اور جسٹن ٹروڈو کے بارے میں افواہیں 2025 کے دوران اس وقت گردش میں آئیں جب دونوں کو مختلف مواقع پر ایک ساتھ دیکھا گیا۔ بعد ازاں سوشل میڈیا پر شیئر کی جانے والی بعض تصاویر اور ویڈیوز نے بھی ان قیاس آرائیوں کو مزید تقویت دی۔

تاہم اب تک نہ کیٹی پیری اور نہ ہی جسٹن ٹروڈو نے اپنے ممکنہ تعلق کے بارے میں عوامی سطح پر کوئی تصدیق یا تردید کی ہے۔