پاکستان کرکٹ بورڈ (پی سی بی) نے خواتین میں چھاتی کے کینسر سے متعلق شعور اجاگر کرنے کے لیے پاکستان اور انگلینڈ کے درمیان 25 اکتوبر کو لاہور میں ہونے والے ون ڈے انٹرنیشنل میچ کو آگاہی مہم سے منسلک کرنے کا اعلان کیا ہے۔
اس مہم کے تحت پاکستانی ٹیم انگلینڈ کے خلاف میچ میں خصوصی گلابی کٹ استعمال کرے گی، جس کا مقصد چھاتی کے کینسر کی بروقت تشخیص اور اس مرض کے بارے میں آگاہی کو فروغ دینا ہے۔
پی سی بی اس مہم میں پنک ربن کے ساتھ اشتراک کر رہا ہے۔ اس سلسلے میں قومی کرکٹرز کی جانب سے دستخط شدہ خصوصی فین شرٹس نیلام کرنے کا فیصلہ بھی کیا گیا ہے۔
نیلامی کے لیے شاہین آفریدی اور بابر اعظم کے دستخط شدہ شرٹس پیش کی جائیں گی۔ اس عمل سے حاصل ہونے والی رقم چھاتی کے کینسر سے متاثرہ ایسی خواتین کے علاج پر خرچ کی جائے گی جو طبی اخراجات برداشت کرنے کی مالی استطاعت نہیں رکھتیں۔
اس اقدام کے ذریعے کرکٹ شائقین کو قومی کھلاڑیوں کی یادگاری شرٹس حاصل کرنے کے ساتھ ساتھ مستحق خواتین کے علاج میں تعاون کا موقع بھی ملے گا۔
پی سی بی کی اس کاوش کا بنیادی مقصد کھیل کے ذریعے ایک اہم سماجی مسئلے کی جانب توجہ مبذول کرانا اور چھاتی کے کینسر سے متاثرہ خواتین کی مدد کے لیے وسائل فراہم کرنا ہے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔