پیرس میں سیاحوں پر چاقو اور ہتھوڑے سے وار

ہاٹ لائن نیوز : پیرس میں ایفل ٹاور کے قریب چاقو سے حملے میں ایک شخص ہلاک اور دوسرا زخمی ہوگیا۔

فرانسیسی پولیس کے مطابق حملہ آور نے چاقو سے حملہ کیا جسے گرفتار کر لیا گیا ہے۔

پولیس نے بتایا کہ 26 سالہ حملہ آور جو کہ فرانسیسی شہری ہے، ایک انتہا پسند اور نفسیاتی مریض ہے، جس نے سیاحوں کو نشانہ بنایا اور ایک جرمن شہری کو قتل کیا۔

فرانسیسی وزیر داخلہ جیرالڈ درمانین کے مطابق مشتبہ شخص نے سیاحت کے لیے فرانس آنے والے ایک جوڑے کے پاس جا کر ان پر حملہ کیا۔

وزیر داخلہ کا مزید کہنا تھا کہ حملے کے بعد پولیس نے ملزم کا پیچھا کیا، اس نے بھاگتے ہوئے مزید دو افراد پر ہتھوڑے سے حملہ کیا، جس کے بعد ملزم کو ٹیزر کی مدد سے روک کر حراست میں لے لیا گیا۔

فرانسیسی وزیر داخلہ نے بتایا کہ گرفتار ملزم کو 2016 میں حملے کی منصوبہ بندی کرنے پر چار سال قید کی سزا سنائی گئی تھی اور وہ فرانسیسی سکیورٹی سروس کی واچ لسٹ میں شامل تھا، جبکہ ملزم نفسیاتی مسائل کا بھی شکار ہے۔