واٹس ایپ ہیک ہوجائے تو یہ فوری اقدامات کریں، پی ٹی اے کی صارفین کو ہدایت

اسلام آباد: واٹس ایپ اکاؤنٹ پر کسی غیر متعلقہ شخص کا قبضہ ہوجانے کی صورت میں صارفین کو گھبرانے کے بجائے فوری طور پر اکاؤنٹ کا کنٹرول واپس لینے کے لیے ضروری اقدامات کرنے چاہئیں۔

پاکستان ٹیلی کمیونیکیشن اتھارٹی (پی ٹی اے) کی جانب سے صارفین کو واٹس ایپ اکاؤنٹس کے تحفظ اور غیر مجاز رسائی کی صورت میں بحالی کے حوالے سے آگاہ کیا گیا ہے۔

اگر کسی صارف کو شبہ ہو کہ اس کا واٹس ایپ اکاؤنٹ کسی اور کے زیر استعمال ہے تو اسے اپنے موبائل فون میں واٹس ایپ دوبارہ انسٹال کرکے اسی فون نمبر سے اکاؤنٹ رجسٹر کرنے کی کوشش کرنی چاہیے۔

رجسٹریشن کے دوران واٹس ایپ متعلقہ موبائل نمبر پر تصدیقی کوڈ بھیجے گا۔ صارف کو یہ کوڈ خود ایپ میں درج کرنا چاہیے۔ کسی دوسرے شخص کو تصدیقی کوڈ بتانے سے گریز کرنا ضروری ہے، کیونکہ اس کے ذریعے اکاؤنٹ پر دوبارہ غیر مجاز رسائی حاصل کی جاسکتی ہے۔

اکاؤنٹ واپس ملنے کے بعد صارفین کو اپنی سیکیورٹی مزید مضبوط بنانے کے لیے ٹو اسٹیپ ویریفکیشن فعال کرنے کا مشورہ دیا جاتا ہے۔ اس سے اکاؤنٹ کے تحفظ کے لیے اضافی سیکیورٹی مرحلہ شامل ہوجاتا ہے۔

اگر دوبارہ تصدیق کے باوجود اکاؤنٹ بحال نہ ہو یا غیر مجاز سرگرمی جاری رہے تو صارف واٹس ایپ کی آفیشل سپورٹ سے رابطہ کرسکتا ہے۔

ماہرین کے مطابق صارفین کو مشکوک لنکس، نامعلوم فائلوں اور غیر متوقع پیغامات سے محتاط رہنا چاہیے۔ جعل ساز اکثر فشنگ لنکس کے ذریعے صارفین کو حساس معلومات فراہم کرنے یا تصدیقی کوڈ شیئر کرنے پر آمادہ کرنے کی کوشش کرتے ہیں۔

صارفین کے لیے ضروری ہے کہ موبائل فون اور متعلقہ ایپلی کیشنز کو تازہ ترین سیکیورٹی اپ ڈیٹس کے ساتھ استعمال کریں، غیر معروف ایپس انسٹال کرنے سے گریز کریں اور اپنے اہم اکاؤنٹس کی سیکیورٹی سیٹنگز کا باقاعدگی سے جائزہ لیتے رہیں۔