واشنگٹن میں صحافیوں کی تقریب کے دوران فائرنگ، ایک شخص گرفتار

واشنگٹن ڈی سی میں وائٹ ہاؤس کے صحافیوں کی سالانہ تقریب کے دوران فائرنگ کے واقعے میں ایک 31 سالہ مشتبہ شخص کو حراست میں لے لیا گیا ہے۔ پولیس کے مطابق ملزم کا تعلق امریکی ریاست کیلیفورنیا سے ہے اور اس کی شناخت کول ٹامس ایلن کے نام سے کی گئی ہے۔
ابتدائی معلومات کے مطابق ملزم لاس اینجلس کے نواحی علاقے ٹورنس کا رہائشی ہے۔ واقعے کے دوران وہ واشنگٹن ہلٹن ہوٹل کے بال روم کی جانب فائرنگ کرتے ہوئے بڑھ رہا تھا کہ سیکیورٹی اہلکاروں نے فوری کارروائی کرتے ہوئے اسے روک لیا اور گرفتار کر لیا۔
واشنگٹن ڈی سی کی انتظامیہ نے بتایا ہے کہ گرفتار شخص اس وقت قریبی اسپتال میں زیر علاج ہے اور پولیس کی نگرانی میں ہے۔ طبی امداد مکمل ہونے کے بعد اسے مزید قانونی کارروائی کے لیے منتقل کیا جائے گا۔
امریکی اٹارنی جنرل کے مطابق ملزم کے خلاف فائرنگ، غیر قانونی اسلحہ رکھنے اور دیگر سنگین الزامات کے تحت مقدمہ درج کرنے کی تیاری کی جا رہی ہے، اور جلد فرد جرم عائد کیے جانے کا امکان ہے۔
حکام واقعے کی وجوہات اور ممکنہ محرکات کا جائزہ لے رہے ہیں۔ ابتدائی تحقیقات میں کسی منظم گروہ یا تنظیم سے تعلق کی تصدیق نہیں ہو سکی۔
پولیس کا کہنا ہے کہ تحقیقات جاری ہیں اور ملزم کو اسپتال سے فارغ ہونے کے بعد باقاعدہ حراست میں لے کر عدالتی کارروائی کا سامنا کرنا ہوگا۔