عثمان خان کا بڑا کارنامہ، پی ایس ایل میں سب سے زیادہ سنچریاں بنانے والے بیٹر بن گئے

کراچی: پاکستان سپر لیگ (پی ایس ایل) میں شاندار بیٹنگ کا سلسلہ جاری رکھتے ہوئے عثمان خان نے ایک نیا ریکارڈ اپنے نام کرلیا۔
پی ایس ایل کے ایک میچ میں، حیدرآباد کنگز مین کے بیٹر عثمان خان نے ملتان سلطانز کے خلاف 214 رنز کے ہدف کے تعاقب میں صرف 47 گیندوں پر 101 رنز کی شاندار اننگز کھیلی۔ اس سنچری کے ساتھ وہ لیگ کی تاریخ میں سب سے زیادہ سنچریاں بنانے والے کھلاڑی بن گئے ہیں۔ یہ ان کے پی ایس ایل کیریئر کی چوتھی سنچری ہے۔
عثمان خان نے اب تک پی ایس ایل میں 33 میچز کھیلے ہیں، جن میں انہوں نے مسلسل بہترین کارکردگی دکھائی ہے۔ اس سے قبل بابر اعظم، فخر زمان، کامران اکمل اور رائلی روسو تین، تین سنچریاں اسکور کرچکے ہیں۔
میچ میں پہلے بیٹنگ کرتے ہوئے ملتان سلطانز نے مقررہ 20 اوورز میں 7 وکٹوں کے نقصان پر 213 رنز بنائے۔ ٹیم کی جانب سے اسٹیو اسمتھ نے 47 گیندوں پر 106 رنز کی جارحانہ اننگز کھیلی، جبکہ صاحبزادہ فرحان نے 66 رنز کا اضافہ کیا۔
ہدف کے تعاقب میں حیدرآباد کنگز مین نے عثمان خان کی سنچری کی بدولت آخری اوور میں کامیابی حاصل کی۔ مارنس لبوشین نے 61 رنز کی اہم اننگز کھیلی جبکہ حسان خان نے مختصر مگر جارحانہ کھیل پیش کیا۔
میچ میں نمایاں کارکردگی پر عثمان خان کو پلیئر آف دی میچ قرار دیا گیا۔
پوائنٹس ٹیبل پر نظر ڈالیں تو حیدرآباد کنگز مین 8 میچز میں 8 پوائنٹس کے ساتھ چوتھے نمبر پر آ گئی ہے، جبکہ ملتان سلطانز 12 پوائنٹس کے ساتھ دوسرے نمبر پر موجود ہے۔