رجب بٹ اور ذوالقرنین سکندر میں تنازع شدت اختیار کر گیا

پاکستان کے معروف یوٹیوبرز رجب بٹ اور ذوالقرنین سکندر کے درمیان جاری تنازع شدت اختیار کر گیا ہے، جہاں دونوں شخصیات ایک دوسرے پر الزامات عائد کر رہی ہیں۔
حالیہ دنوں میں رجب بٹ اپنی ذاتی زندگی اور قانونی معاملات کے باعث خبروں میں رہے ہیں، تاہم اب وہ اپنے قریبی حلقے کے افراد کے ساتھ ایک نئے تنازع میں بھی گھر گئے ہیں۔
یہ معاملہ اس وقت سامنے آیا جب ذوالقرنین سکندر نے ایک تفصیلی ویڈیو جاری کی، جس میں انہوں نے رجب بٹ پر تنقید کرتے ہوئے دعویٰ کیا کہ رجب کی شادی کے لیے اسپانسرز کے انتظام میں انہوں نے اور کنول آفتاب نے اہم کردار ادا کیا تھا۔ ذوالقرنین نے اپنے دعووں کے حق میں آڈیو ریکارڈنگز بھی شیئر کیں اور رجب بٹ پر نامناسب زبان استعمال کرنے کے الزامات لگائے۔
دوسری جانب رجب بٹ نے ان الزامات کو مسترد کرتے ہوئے سخت ردعمل دیا۔ ان کا کہنا تھا کہ انہیں توقع تھی کہ یہ معاملہ براہِ راست بات چیت سے حل کیا جائے گا، مگر اسے وی لاگ کے ذریعے عوامی سطح پر لے جایا گیا۔ انہوں نے اپنے بیان میں کہا کہ اگر انہوں نے کسی کو ’آنٹی‘ کہا تو اس میں کوئی برائی نہیں، اور اس بات کو غلط انداز میں پیش کیا جا رہا ہے۔
رجب بٹ نے یہ بھی واضح کیا کہ وہ اس تنازع کا بھرپور جواب دیں گے اور اپنے مؤقف پر قائم رہیں گے۔
اس صورتحال پر سوشل میڈیا صارفین کی آراء تقسیم دکھائی دیتی ہیں۔ کچھ افراد دونوں فریقین کو ذاتی معاملات کو عوامی بنانے پر تنقید کا نشانہ بنا رہے ہیں، جبکہ دیگر مختلف پہلوؤں پر تبصرے کر رہے ہیں۔
یہ تنازع آن لائن کمیونٹی میں ایک نئی بحث کو جنم دے چکا ہے، جو تاحال جاری ہے۔