دیشا پٹانی کے گھر پر حملہ: فلم انڈسٹری کو نشانہ بنایا جا رہا ہے؟

معروف بھارتی اداکارہ دیشا پٹانی کے گھر کے باہر فائرنگ کا افسوسناک واقعہ پیش آیا ہے، تاہم اداکارہ اور ان کے اہلِ خانہ معجزانہ طور پر محفوظ رہے۔

یہ واقعہ جمعہ اور ہفتہ کی درمیانی شب تقریباً ساڑھے تین بجے پیش آیا، جب دو نامعلوم موٹر سائیکل سواروں نے اداکارہ کے گھر پر اندھا دھند فائرنگ کردی۔ واقعے کے فوری بعد پولیس کو اطلاع دی گئی، جس پر قانون نافذ کرنے والے ادارے حرکت میں آئے۔

پولیس ذرائع کے مطابق، فائرنگ کی وجوہات کی چھان بین جاری ہے اور مختلف پہلوؤں سے تفتیش کی جا رہی ہے۔ ابتدائی اطلاعات میں یہ بات سامنے آئی ہے کہ واقعے کی ذمہ داری ایک بدنام زمانہ گینگ نے سوشل میڈیا کے ذریعے قبول کی ہے، جس میں مبینہ طور پر دیشا پٹانی کی بہن کی جانب سے ایک مذہبی شخصیت سے متعلق متنازع بیان کو وجہ قرار دیا گیا ہے۔

اداکارہ کے والد کی جانب سے واقعے کی ایف آئی آر درج کروائی گئی ہے، جس کے بعد پولیس نے معاملے کی مکمل تحقیقات کے لیے پانچ خصوصی ٹیمیں تشکیل دے دی ہیں۔ پولیس کا کہنا ہے کہ واقعے میں ملوث عناصر کو جلد قانون کے کٹہرے میں لایا جائے گا۔

ادھر، سوشل میڈیا پر جاری بیان میں فلم انڈسٹری سے وابستہ دیگر شخصیات کو بھی خبردار کیا گیا ہے، جس پر سیکیورٹی ادارے مزید محتاط ہو گئے ہیں۔

فی الحال اداکارہ اور ان کے خاندان کی سیکیورٹی بڑھا دی گئی ہے، جبکہ مقامی انتظامیہ اور پولیس کی جانب سے عوام سے اپیل کی گئی ہے کہ افواہوں پر یقین نہ کریں اور کسی بھی مشکوک سرگرمی کی فوری اطلاع متعلقہ حکام کو دیں۔