تل ابیب کے آسمان پر کوؤں کا غول شہریوں کے لیے حیرت کا باعث

تل ابیب، اسرائیل – حالیہ دنوں میں تل ابیب کے آسمان پر ہزاروں کوؤں کے ایک ساتھ پرواز کرنے کی ویڈیوز سوشل میڈیا پر وائرل ہو رہی ہیں۔ شہریوں نے اس غیر معمولی منظر کو حیرت اور تجسس کے ساتھ دیکھا، جبکہ بعض صارفین نے اسے غیر معمولی یا برا شگون قرار دیا۔
ویڈیوز میں دیکھا جا سکتا ہے کہ کوؤں کے جھنڈ شہر کے اوپر منڈلا رہے ہیں، اور ان مناظر پر انٹرنیٹ صارفین کی مختلف رائے سامنے آئی ہیں۔ کچھ لوگوں نے اسے نحوست یا مستقبل کی تباہی کی علامت کے طور پر پیش کیا، تاہم ماہرین اور پرندہ شناسوں کا کہنا ہے کہ یہ ایک بالکل فطری عمل ہے۔
سائنسی ماہرین کے مطابق، کوؤں کا یہ گروہی پرواز کرنا مختلف وجوہات کی بنا پر ہو سکتا ہے، جیسے موسم کی تبدیلی کے دوران محفوظ اور گرم مقامات کی تلاش، خوراک کے حصول کے لیے نقل مکانی، یا شکاریوں سے بچاؤ کے لیے دفاعی حکمتِ عملی۔
ماہرین نے واضح کیا کہ یہ مناظر بصری طور پر تو حیران کن ہیں، لیکن انہیں کسی بھی قسم کی آفات یا سیاسی حالات سے جوڑنا درست نہیں۔ یہ پرندوں کی زندگی کا ایک معمولی حصہ ہے جو قدرتی ضرورت کے مطابق پیش آتا رہتا ہے۔