بوگاٹی کا 137 انچ کا فولڈنگ ٹی وی متعارف

لگژری گاڑیوں کے لیے دنیا بھر میں مشہور فرانسیسی برانڈ بوگاٹی نے گھریلو ٹیکنالوجی کے شعبے میں بھی قدم رکھتے ہوئے ایک جدید سپر ٹی وی پیش کردیا ہے۔ کمپنی نے آسٹریا کی ڈسپلے ٹیکنالوجی فرم سی-سیڈ کے اشتراک سے تیار کیے گئے N°1 Super TV میں بڑے سائز، جدید ڈسپلے اور منفرد ڈیزائن کو یکجا کیا ہے۔

یہ ٹی وی 110 اور 137 انچ کے دو سائز میں دستیاب ہوگا۔ خاص طور پر 137 انچ کا ماڈل بڑے گھروں، کشادہ کمروں اور ہوم تھیٹر کے لیے ڈیزائن کیا گیا ہے۔ اس کا انداز بوگاٹی کی ٹوربیون ہائپرکار سے متاثر ہے، جبکہ خم دار ساخت اور مخصوص ’C‘ ڈیزائن اسے عام ٹیلی ویژن سے منفرد بناتے ہیں۔

اس کی سب سے خاص بات اسکرین کا فولڈ ہو کر فرنیچر نما یونٹ میں چھپ جانا ہے۔ ٹی وی استعمال میں نہ ہو تو اس کی پوری اسکرین مخصوص کیبنٹ کے اندر چلی جاتی ہے، جبکہ بٹن دبانے پر تقریباً 45 سیکنڈ میں دوبارہ کھل جاتی ہے۔

ٹی وی میں 4K MicroLED ڈسپلے، HDR10 Plus سپورٹ اور روشنی کے انعکاس کو کم کرنے والی خصوصی کوٹنگ شامل ہے۔ کمپنی کے مطابق یہ خصوصیات روشن کمروں میں بھی بہتر رنگ، کنٹراسٹ اور تصویر کا معیار فراہم کرنے میں مدد دیتی ہیں۔ فولڈنگ اسکرین کے مختلف حصوں میں تصویر کے معیار کو یکساں رکھنے کے لیے خصوصی کیلیبریشن ٹیکنالوجی بھی استعمال کی گئی ہے۔

N°1 Super TV کو 180 ڈگری تک گھمایا بھی جاسکتا ہے، جس سے صارف کمرے میں بیٹھنے کی جگہ یا ترتیب تبدیل ہونے کے بعد اسکرین کا رخ اپنی ضرورت کے مطابق کرسکتا ہے۔

آڈیو کے لیے Wisdom Audio کا خصوصی ساؤنڈ سسٹم شامل کیا گیا ہے۔ اس کے پلانر میگنیٹک اسپیکرز ٹی وی کھلنے پر خود بخود باہر آتے ہیں اور اسکرین بند ہونے پر دوبارہ یونٹ کے اندر چلے جاتے ہیں۔

بوگاٹی نے ٹی وی کی تیاری میں کاربن فائبر سمیت اعلیٰ معیار کے مواد استعمال کیے ہیں۔ اسے میٹ سلور فنش میں پیش کیا گیا ہے جبکہ خریدار اپنی پسند کے مطابق مختلف رنگوں اور فنشز کا انتخاب بھی کرسکتے ہیں۔

کمپنی نے ابھی تک اس شاہانہ ٹی وی کی قیمت ظاہر نہیں کی، تاہم اسے منتخب ڈیلرز کے ذریعے فروخت کیا جائے گا۔ اس کی غیر معمولی جسامت، جدید ٹیکنالوجی اور لگژری ڈیزائن کو دیکھتے ہوئے یہ واضح ہے کہ N°1 Super TV عام گھریلو صارف کے بجائے انتہائی مہنگی اور خصوصی مصنوعات کے شوقین افراد کو مدنظر رکھ کر تیار کیا گیا ہے۔

بوگاٹی کا یہ نیا منصوبہ ظاہر کرتا ہے کہ کمپنی اپنی آٹو موبائل شناخت سے آگے بڑھ کر لگژری طرزِ زندگی اور جدید گھریلو ڈیزائن کے شعبے میں بھی اپنی موجودگی مضبوط بنانے کی کوشش کر رہی ہے۔