بابر اعظم نے بین الاقوامی کرکٹ میں 15 ہزار رنز مکمل کر لیے

فیصل آباد: پاکستان کے کپتان اور مایہ ناز بلے باز بابر اعظم نے بین الاقوامی کرکٹ میں 15,000 رنز مکمل کر کے ایک نیا سنگ میل عبور کر لیا ہے۔ یہ کارنامہ انہوں نے جنوبی افریقہ کے خلاف فیصل آباد کے اقبال اسٹیڈیم میں جاری تیسرے ون ڈے میچ کے دوران انجام دیا۔

بابر اعظم نے جب اپنا 23واں رن مکمل کیا تو ان کے مجموعی بین الاقوامی رنز کی تعداد 15 ہزار تک پہنچ گئی۔ اس طرح وہ انضمام الحق، یونس خان، محمد یوسف اور جاوید میانداد کے بعد یہ اعزاز حاصل کرنے والے پانچویں پاکستانی بلے باز بن گئے ہیں۔

پاکستان کے سب سے زیادہ بین الاقوامی رنز بنانے والے بلے بازوں میں اب بابر اعظم پانچویں نمبر پر ہیں:

انضمام الحق – 20,541 رنز

یونس خان – 17,790 رنز

محمد یوسف – 17,134 رنز

جاوید میانداد – 16,213 رنز

بابر اعظم – 15,004 رنز

تیسرے ون ڈے میں بابر اعظم نے 32 گیندوں پر 27 رنز بنائے، جس میں پانچ چوکے شامل تھے، تاہم وہ رن آؤٹ ہو گئے۔

بابر اعظم اب تک ٹیسٹ کرکٹ میں 4,366 رنز، ون ڈے میں 6,330 رنز اور ٹی ٹوئنٹی انٹرنیشنلز میں 4,302 رنز بنا چکے ہیں۔ ان کے کیریئر میں 31 سنچریاں اور 104 نصف سنچریاں شامل ہیں۔

کرکٹ شائقین اور تجزیہ کاروں نے بابر اعظم کی مستقل مزاجی اور کارکردگی کو سراہتے ہوئے انہیں پاکستان کرکٹ کا فخر قرار دیا ہے۔ ان کا کہنا ہے کہ بابر اعظم کا یہ سنگ میل نہ صرف ذاتی کامیابی ہے بلکہ پاکستان کرکٹ کی تاریخ کا ایک اور یادگار لمحہ بھی ہے۔