ایک ویزا، کئی عمرے؟ سعودی عرب کی نئی وضاحت نے سب کو چونکا دیا

سعودی عرب نے ایک سالہ ملٹی پل انٹری عمرہ ویزا رکھنے والے زائرین کے لیے نئے سفری طریقہ کار کی وضاحت کردی ہے۔ اس ویزے کے باوجود زائرین ہر بار بغیر کسی اضافی کارروائی کے عمرے کے لیے سعودی عرب کا سفر نہیں کرسکیں گے۔
نئے طریقہ کار کے مطابق ہر مرتبہ عمرہ ادا کرنے سے قبل زائر کو تازہ سروس پیکیج حاصل کرنا ہوگا، جس کے بعد عمرہ پرمٹ جاری کیا جائے گا۔
سعودی عرب نے رواں سال جولائی میں ایک سال کے لیے کارآمد ملٹی پل انٹری عمرہ ویزا متعارف کرایا تھا۔ اس کے تحت اہل زائرین ویزے کی مدت کے دوران متعدد مرتبہ سعودی عرب میں داخل ہوسکتے ہیں۔
تاہم حکام کی وضاحت کے مطابق ویزے کی موجودگی خود بخود ہر نئے عمرہ سفر کی اجازت نہیں دیتی۔ اگر کوئی زائر ایک ہی سال میں دوسری یا تیسری مرتبہ عمرہ ادا کرنا چاہتا ہے تو اسے نئے سفر سے پہلے سروس پیکیج اور عمرہ پرمٹ کے لیے مقررہ طریقہ کار دوبارہ مکمل کرنا ہوگا۔
حکام کا کہنا ہے کہ اس نظام کا مقصد عمرہ زائرین کے سفری اور انتظامی مراحل کو واضح رکھنا ہے، تاکہ ملٹی پل انٹری ویزا رکھنے والے افراد اس حوالے سے کسی غلط فہمی کا شکار نہ ہوں۔
یوں ایک سالہ ملٹی پل انٹری عمرہ ویزا متعدد بار سعودی عرب جانے کی سہولت ضرور دیتا ہے، لیکن ہر نئے عمرہ سفر کے لیے مطلوبہ سروس پیکیج اور پرمٹ کا حصول ضروری ہوگا۔