ایران کی متحدہ عرب امارات کو اسرائیل سے تعلقات پر سخت تنبیہ

ایران اور متحدہ عرب امارات کے درمیان حالیہ بیانات کے بعد خطے میں سفارتی کشیدگی میں اضافے کے خدشات سامنے آ رہے ہیں۔ تہران کی جانب سے ابوظہبی کو اسرائیل کے ساتھ تعلقات کے حوالے سے محتاط رہنے کا انتباہ دیا گیا ہے۔
ایرانی سپریم لیڈر کے ملٹری امور کے مشیر اور پاسدارانِ انقلاب کے سابق کمانڈر محسن رضائی نے کہا ہے کہ ایران متحدہ عرب امارات اور اسرائیل کے بڑھتے روابط پر نظر رکھے ہوئے ہے۔ ان کے مطابق ایران نے اب تک امارات کے ساتھ تعلقات مکمل طور پر منقطع نہیں کیے، تاہم خطے میں کسی بھی ایسے اقدام سے گریز ضروری ہے جو کشیدگی بڑھا سکتا ہو۔
دوسری جانب متحدہ عرب امارات اور اسرائیل کے تعلقات میں حالیہ برسوں میں نمایاں بہتری دیکھی گئی ہے، جسے ایران خطے کے توازن کے لیے حساس معاملہ قرار دیتا رہا ہے۔
ایرانی وزیر خارجہ عباس عراقچی بھی اس سے قبل امارات کے رویے پر تنقید کر چکے ہیں۔ ان کا مؤقف رہا ہے کہ بعض علاقائی بحرانوں کے دوران امارات کی جانب سے ایران کے مؤقف کی کھل کر حمایت نہیں کی گئی۔
دوسری طرف اسرائیلی میڈیا میں یہ دعویٰ بھی سامنے آیا کہ اسرائیلی وزیرِاعظم بنیامین نیتن یاہو نے مبینہ طور پر خفیہ دورہ امارات کیا، تاہم متحدہ عرب امارات نے ان رپورٹس کو مسترد کر دیا ہے۔
اسی دوران خطے میں سیکیورٹی خدشات بھی برقرار ہیں، خصوصاً اس وقت جب امارات کے بعض حساس تنصیبات کے قریب ڈرون سرگرمیوں سے متعلق رپورٹس سامنے آ چکی ہیں، تاہم کسی فریق کی جانب سے براہِ راست ذمہ داری قبول نہیں کی گئی۔
ماہرین کے مطابق ایران، اسرائیل اور امریکہ کے درمیان جاری کشیدگی کے پس منظر میں ایران اور امارات کے بیانات کا یہ تبادلہ خلیجی خطے میں سفارتی ماحول مزید پیچیدہ بنا سکتا ہے۔