ایران کا حوثیوں سے براہِ راست تعلق سے انکار، سیاسی حل پر زور

تہران: ایران نے یمن کے حوثی گروپ کے اقدامات سے خود کو براہِ راست الگ قرار دیتے ہوئے کشیدگی کے خاتمے کے لیے فوجی کارروائی کے بجائے سیاسی اور سفارتی ذرائع اختیار کرنے کی تجویز پیش کی ہے۔

ایرانی وزیر خارجہ عباس عراقچی نے کہا ہے کہ حوثیوں کے خلاف حملوں کے بجائے سیاسی رابطوں اور مذاکرات کے ذریعے معاملات کو حل کرنے کی کوشش کی جانی چاہیے۔

یہ پیش رفت ایسے وقت سامنے آئی ہے جب خطے میں حوثیوں سے متعلق کشیدگی برقرار ہے اور ان کے خلاف ممکنہ فوجی اقدامات پر بھی غور کیا جا رہا ہے۔

رپورٹ کے مطابق ایرانی تجویز پر حتمی فیصلہ اسٹریٹجک پولیٹیکل اینڈ ڈیفنس کمیٹی کرے گی۔ اس سلسلے میں متعلقہ فریقوں کے درمیان موجود دفاعی معاہدے کو بھی مدنظر رکھا جائے گا۔

ایران کی جانب سے حوثیوں کے اقدامات سے براہِ راست لاتعلقی کے اظہار کے بعد معاملے میں تہران کے مؤقف کو اہم قرار دیا جا رہا ہے، تاہم آئندہ پالیسی اور عملی اقدامات کا فیصلہ متعلقہ حکام کی منظوری کے بعد ہوگا۔