امریکا میں گیس اسٹیشن سسٹمز پر سائبر حملے، ایرانی ہیکرز پر شبہ

امریکا کی مختلف ریاستوں میں گیس اسٹیشنز کے ایندھن ذخیرہ کرنے والے ٹینکوں کی نگرانی کرنے والے سسٹمز پر سائبر حملے کا انکشاف ہوا ہے۔ امریکی حکام کے مطابق حملہ آوروں نے ان آٹو میٹک ٹینک گیجنگ سسٹمز کو نشانہ بنایا جو انٹرنیٹ سے منسلک تھے اور مناسب پاس ورڈ سیکیورٹی سے محروم تھے۔
رپورٹس کے مطابق بعض مقامات پر ہیکرز ٹینکوں کی اسکرین پر ظاہر ہونے والے ڈیٹا میں ردوبدل کرنے میں کامیاب رہے، تاہم ایندھن کی اصل مقدار متاثر نہیں ہوئی اور نہ ہی کسی قسم کے دھماکے یا جسمانی نقصان کی اطلاع ملی۔
سائبر سیکیورٹی ماہرین نے خبردار کیا ہے کہ اگر ایسے سسٹمز غیر محفوظ رہیں تو مستقبل میں خطرناک صورتحال پیدا ہو سکتی ہے، کیونکہ ہیکرز ممکنہ طور پر گیس لیک جیسے مسائل کو چھپا سکتے ہیں۔
تحقیقات سے وابستہ ذرائع کا کہنا ہے کہ ایرانی ہیکرز اس معاملے میں اہم مشتبہ سمجھے جا رہے ہیں، کیونکہ ماضی میں بھی امریکا کے تیل، گیس اور پانی کے انفراسٹرکچر پر سائبر حملوں میں ایران سے منسلک گروہوں کا نام سامنے آتا رہا ہے۔
تاہم امریکی حکام نے ابھی تک کسی ملک یا گروہ کی حتمی ذمہ داری کی تصدیق نہیں کی، کیونکہ حملہ آور بہت کم ڈیجیٹل شواہد چھوڑ کر گئے ہیں۔
یہ واقعہ ایسے وقت سامنے آیا ہے جب امریکا، اسرائیل اور ایران کے درمیان خطے میں کشیدگی میں اضافہ دیکھا جا رہا ہے۔