آزاد کشمیر انتخابات: دوسرے مرحلے میں ن لیگ 5، پیپلز پارٹی 2 نشستوں پر کامیاب

آزاد جموں و کشمیر قانون ساز اسمبلی کے انتخابات کے دوسرے مرحلے میں مظفرآباد ڈویژن کی نشستوں اور کشمیری مہاجرین کے حلقوں میں پولنگ کے بعد غیر سرکاری اور غیر حتمی نتائج موصول ہونا شروع ہوگئے ہیں۔

اب تک سامنے آنے والے نتائج کے مطابق پاکستان مسلم لیگ (ن) 5 نشستوں پر کامیابی حاصل کرچکی ہے، جبکہ پاکستان پیپلز پارٹی ایک نشست پر کامیاب ہوئی ہے۔ متعدد دیگر حلقوں میں ووٹوں کی گنتی جاری ہے، جہاں مسلم لیگ (ن) کو کئی نشستوں پر برتری حاصل ہے۔

الیکشن کمیشن کے مطابق شدید بارشوں اور لینڈ سلائیڈنگ کے باعث حلقہ ایل اے 27 میں پولنگ ملتوی کردی گئی ہے، جہاں اب ووٹنگ 4 اگست کو ہوگی۔

مہاجرین کی نشستوں کے نتائج

غیر سرکاری نتائج کے مطابق:

– ایل اے 41، 42، 43 اور 44 پر مسلم لیگ (ن) کے امیدوار کامیاب قرار پائے۔
– ایل اے 45 پر پاکستان پیپلز پارٹی کے امیدوار نے کامیابی حاصل کی۔

مظفرآباد ڈویژن

– ایل اے 29 مظفرآباد 3 سے پاکستان پیپلز پارٹی کے سردار مختار عباسی کامیاب ہوئے۔
– ایل اے 30 مظفرآباد 4 سے مسلم لیگ (ن) کے ڈاکٹر مصطفیٰ بشیر نے کامیابی حاصل کی۔

دیگر کئی حلقوں میں ووٹوں کی گنتی جاری ہے، جہاں مسلم لیگ (ن) اور پاکستان پیپلز پارٹی کے امیدواروں کے درمیان مقابلہ جاری ہے۔

دوسری جانب پاکستان پیپلز پارٹی نے مختلف حلقوں میں انتخابی بے ضابطگیوں، تشدد اور مبینہ دھاندلی کے الزامات عائد کرتے ہوئے الیکشن کمیشن سے تحقیقات کا مطالبہ کیا ہے۔ مسلم لیگ (ن) نے ان الزامات کو مسترد کرتے ہوئے انہیں بے بنیاد قرار دیا ہے۔

واضح رہے کہ آزاد کشمیر اسمبلی کے انتخابات تین مراحل میں منعقد کیے جا رہے ہیں۔ پہلے مرحلے کے بعد دوسرا مرحلہ مکمل ہوچکا ہے، جبکہ تیسرے مرحلے کی پولنگ 10 اگست کو ہوگی۔

نوٹ: یہ نتائج غیر سرکاری اور غیر حتمی ہیں، جن میں سرکاری اعلان تک تبدیلی کا امکان موجود ہے۔