گلیکسی زیڈ ٹرائی فولڈ: سام سنگ کا مہنگا اور جدید فون

سام سنگ نے اپنا نیا گلیکسی زیڈ ٹرائی فولڈ اسمارٹ فون متعارف کروا دیا ہے، جو تین بار فولڈ ہونے کی خصوصیت رکھتا ہے اور محدود صارفین کے لیے ڈیزائن کیا گیا ہے۔ کمپنی کے مطابق یہ فون 12 دسمبر سے دستیاب ہوگا اور اس کی قیمت 2,443 ڈالر مقرر کی گئی ہے، جو حالیہ آئی فون 17 سے تقریباً دوگنی ہے۔

یہ ڈیوائس کھولنے پر 10 انچ کی بڑی اسکرین فراہم کرتا ہے اور کام یا تخلیقی سرگرمیوں کے لیے بہتر سہولتیں فراہم کرتا ہے۔ فون صرف سیاہ رنگ میں دستیاب ہوگا، اس کا وزن 309 گرام ہے اور فولڈ ہونے پر موٹائی 0.2 انچ سے کم رہ جاتی ہے۔

سام سنگ کا کہنا ہے کہ یہ فون بڑے پیمانے پر فروخت کے لیے نہیں بلکہ خاص صارفین کے لیے تیار کیا گیا ہے، اور کمپنی کے ایگزیکٹو نائب صدر کم سیونگ اُن نے اسے ’’اسپیشل ایڈیشن‘‘ قرار دیا ہے۔ اس کے علاوہ فون میں جنریٹیو اے آئی فیچرز شامل ہیں جو اسکرین یا کیمرہ شیئرنگ کے دوران فوری معاونت فراہم کرتے ہیں۔

یاد رہے کہ سام سنگ اس ٹرائی فولڈ ٹیکنالوجی کا پہلا ادارہ نہیں ہے؛ چین کی ہواوے کمپنی نے گزشتہ سال اسی طرح کا فون متعارف کرایا تھا۔

عالمی اسمارٹ فون مارکیٹ میں سست روی کے باعث کمپنیاں منفرد ڈیزائنز اور جدید فیچرز کے ذریعے اپنی مصنوعات کو نمایاں کرنے کی کوشش کر رہی ہیں۔ ریسرچ فرم کاؤنٹر پوائنٹ کے مطابق 2025 میں ایپل عالمی مارکیٹ میں سام سنگ سے آگے نکل سکتا ہے، جس کے مارکیٹ شیئر 19.4 فیصد جبکہ سام سنگ کا 18.7 فیصد رہنے کا امکان ہے۔

اسی دوران یہ بھی افواہیں گردش میں ہیں کہ ایپل اگلے سال اپنا فولڈنگ آئی فون متعارف کرا سکتا ہے۔