ملک کے مختلف شہروں میں چینی 220 روپے فی کلو تک پہنچ گئی

اسلام آباد: ملک بھر میں چینی کی قیمتوں میں ایک بار پھر اضافہ دیکھنے میں آیا ہے، بعض شہروں میں فی کلو چینی کی قیمت 220 روپے تک جا پہنچی ہے۔

ادارۂ شماریات کے تازہ اعداد و شمار کے مطابق گزشتہ ہفتے کے دوران سرگودھا میں چینی کی فی کلو قیمت میں 23 روپے، جبکہ کراچی اور حیدرآباد میں 5 روپے تک اضافہ ریکارڈ کیا گیا۔ اس اضافے کے بعد ملک کے مختلف شہروں میں چینی کی زیادہ سے زیادہ قیمت 220 روپے فی کلو تک پہنچ گئی ہے۔

رپورٹ کے مطابق راولپنڈی، کراچی اور سرگودھا میں چینی 200 روپے فی کلو تک فروخت ہو رہی ہے، جبکہ حیدرآباد میں قیمت 190 سے بڑھ کر 195 روپے فی کلو تک پہنچ گئی ہے۔

دلچسپ بات یہ ہے کہ ایک جانب چینی کی اوسط قیمت میں معمولی کمی ریکارڈ کی گئی ہے، جو اب 188 روپے 69 پیسے فی کلو ہے، جب کہ گزشتہ ہفتے یہ اوسط قیمت 188 روپے 81 پیسے تھی۔ ایک سال قبل یہی اوسط قیمت 132 روپے 47 پیسے تھی۔

مارکیٹ ذرائع کے مطابق لاہور میں چینی کی قیمتوں میں سب سے زیادہ اضافہ دیکھنے میں آ رہا ہے، جہاں چینی 200 سے 220 روپے فی کلو تک فروخت کی جا رہی ہے۔