ٹریفک خلاف ورزی: قومی کرکٹر عرفان خان پولیس کی نظر میں آگئے

پاکستان کرکٹ ٹیم کے آل راؤنڈر عرفان خان ٹریفک قوانین کی خلاف ورزی پر پولیس کی نظر میں آگئے، جس کی ویڈیو سوشل میڈیا پر وائرل ہو گئی۔
تفصیلات کے مطابق عرفان خان اپنی گاڑی میں سفر کر رہے تھے کہ اس دوران انہوں نے سیٹ بیلٹ نہیں پہن رکھی تھی۔ ٹریفک پولیس اہلکار نے معمول کی چیکنگ کے دوران انہیں روکا اور قانون کی خلاف ورزی کی نشاندہی کی۔
ویڈیو میں دیکھا جا سکتا ہے کہ اہلکار نے کرکٹر کو سیٹ بیلٹ نہ پہننے پر آگاہ کیا اور چالان کے بارے میں سوال کیا۔ تاہم بعد ازاں جب اہلکار کو معلوم ہوا کہ گاڑی میں موجود شخص قومی کرکٹر ہے تو ماحول خوشگوار ہو گیا اور گفتگو دوستانہ انداز اختیار کر گئی۔
بات چیت کے دوران کرکٹ اور ٹیم کی کارکردگی پر بھی تبادلہ خیال ہوا۔ پولیس اہلکار نے انہیں سیفٹی کے اصولوں پر عمل کرنے کی تاکید کرتے ہوئے کہا کہ سیٹ بیلٹ کا استعمال ہر صورت ضروری ہے۔
بعد ازاں اہلکار نے مزاحیہ انداز میں جرمانے کا ذکر کیا، تاہم معاملہ سخت کارروائی کے بجائے وارننگ پر ختم کر دیا گیا۔
یاد رہے کہ عرفان خان پاکستان کی جانب سے ون ڈے اور ٹی ٹوئنٹی انٹرنیشنل میچز کھیل چکے ہیں، جبکہ ان کی ٹیم نے حالیہ ٹورنامنٹ میں نمایاں کارکردگی دکھاتے ہوئے فائنل تک رسائی حاصل کی، تاہم فیصلہ کن معرکے میں شکست کا سامنا کرنا پڑا۔