ایپل کا پہلا فولڈ ایبل آئی فون کیسا ہوگا؟ تفصیلات لیک

ایپل کے مبینہ پہلے فولڈ ایبل آئی فون، جسے غیر رسمی طور پر “آئی فون الٹرا” کہا جا رہا ہے، کے حوالے سے مختلف لیکس اور ڈمی ماڈلز نے اس کے ممکنہ ڈیزائن پر کافی روشنی ڈالی ہے۔

یوٹیوب پر سامنے آنے والی ایک ویڈیو میں اس ڈیوائس کے ڈمی یونٹس دکھائے گئے، جن سے اندازہ ہوتا ہے کہ یہ فون روایتی اسمارٹ فونز سے کافی مختلف ہوگا۔ ویڈیو کے مطابق فون کے کچھ فزیکل بٹن، جیسے والیوم کنٹرول، اوپر کی جانب رکھے جا سکتے ہیں جبکہ اسپیکرز کو مختلف کونوں میں تقسیم کیا گیا ہے۔

پچھلے حصے پر دو کیمرے دیے جانے کا امکان ہے، جو ایپل کے کلاسک آئی فون ڈیزائن سے ملتا جلتا ہوگا لیکن زیادہ سادہ اور بلیک فِنش کے ساتھ۔

لیک ہونے والی معلومات کے مطابق یہ ڈیوائس بند ہونے پر ایک نسبتاً موٹے اور چوکور فون کی شکل اختیار کرے گی، جبکہ کھلنے پر یہ ایک چھوٹے ٹیبلٹ جیسا تجربہ فراہم کرے گی۔ اس کا فولڈنگ میکانزم کتاب کی طرح اندر کی طرف ہوگا۔

ڈیزائن کے حوالے سے بتایا جا رہا ہے کہ یہ موجودہ فولڈ ایبل فونز سے مختلف ہوگا، کیونکہ اس کی چوڑائی زیادہ اور لمبائی نسبتاً کم رکھی جا سکتی ہے۔ کھلنے پر یہ تقریباً 7.8 انچ کی اسکرین کے ساتھ سامنے آئے گا، جبکہ بند حالت میں اس کی اسکرین تقریباً 5.5 انچ ہوگی۔

افواہوں کے مطابق اس ڈیوائس میں ایپل کا نیا اے 20 پرو چپ سیٹ شامل کیا جا سکتا ہے اور بیٹری کی گنجائش تقریباً 5500 ایم اے ایچ تک ہونے کا امکان ظاہر کیا جا رہا ہے۔

کیمرا سیٹ اپ بھی کافی سادہ مگر جدید ہوگا، جس میں دو لینز، ایک فلیش اور مائیکروفون شامل ہو سکتے ہیں۔ مجموعی طور پر اس ڈیوائس کا مقصد ایک ایسا ہائبرڈ تجربہ دینا بتایا جا رہا ہے جو فون اور ٹیبلٹ دونوں کی خصوصیات کو یکجا کرے۔