برازیل کے صدر لولا ڈی سلوا کی عالمی رہنماؤں کی بیانات پر تنقید

برازیل کے صدر لولا ڈی سلوا نے اسپین کے شہر بارسلونا میں منعقدہ ترقی پسند رہنماؤں کی ایک کانفرنس سے خطاب کرتے ہوئے عالمی سیاست میں کشیدگی اور سوشل میڈیا کے استعمال پر تشویش کا اظہار کیا ہے۔
انہوں نے کہا کہ دنیا روزانہ ایسے پیغامات یا بیانات برداشت نہیں کر سکتی جن میں کسی ملک کے صدر کی جانب سے دھمکیوں یا جنگ جیسے اعلانات شامل ہوں۔ ان کے مطابق عالمی رہنماؤں کو اپنے الفاظ اور رویّے میں زیادہ ذمہ داری دکھانی چاہیے۔
صدر لولا نے بالخصوص امریکہ کے سابق صدر ڈونلڈ ٹرمپ کے طرزِ عمل پر تنقید کرتے ہوئے کہا کہ ایسے بیانات عالمی امن کے لیے خطرہ بن سکتے ہیں۔ ان کا کہنا تھا کہ دنیا کو ایسے حالات کی ضرورت نہیں جن میں ہر روز صبح یا رات کو اس نوعیت کی دھمکی آمیز باتیں سامنے آئیں۔
انہوں نے مزید کہا کہ ایران سے متعلق کشیدگی اور جنگ کے خطرات کو روکنے کے لیے اقوام متحدہ کی سلامتی کونسل کے مستقل ارکان کو بھی اپنے کردار اور پالیسیوں پر نظرثانی کرنا ہوگی، تاکہ عالمی سطح پر امن قائم رکھا جا سکے۔