گوگل سرچ میں جدید اے آئی فیچرز متعارف

گوگل اپنے سرچ انجن کو روایتی انداز سے نکال کر مصنوعی ذہانت پر مبنی ایک زیادہ انٹرایکٹو پلیٹ فارم میں تبدیل کر رہا ہے۔ کمپنی کا مقصد یہ ہے کہ صارفین گوگل سرچ کو اسی طرح استعمال کریں جیسے وہ اس کے اے آئی ماڈل جیمنائی سے بات چیت کرتے ہیں۔
گوگل نے اعلان کیا ہے کہ سرچ میں موجود اے آئی اوورویوز فیچر کو اب جدید جیمنائی 3 ماڈل سے منسلک کیا جا رہا ہے، جس سے جوابات مزید بہتر، تفصیلی اور فطری انداز میں فراہم کیے جا سکیں گے۔
اس کے ساتھ ساتھ گوگل سرچ میں ایک نئی اے آئی چیٹ ونڈو بھی شامل کی جا رہی ہے، جس کے ذریعے صارفین اپنے سوالات کے بعد مزید ضمنی یا فالو اَپ سوالات بھی پوچھ سکیں گے۔ اس سے قبل ایسے سوالات کے لیے صارفین کو الگ سے گوگل کے اے آئی موڈ میں جانا پڑتا تھا۔
یہ نئی اپ ڈیٹ کچھ عرصے سے آزمائشی مراحل میں تھی، جسے اب دنیا بھر میں موبائل صارفین کے لیے بتدریج متعارف کرایا جا رہا ہے۔
ماضی میں گوگل سرچ زیادہ تر کی ورڈز پر انحصار کرتی تھی، جس کے نتیجے میں صارفین کو بے شمار لنکس اور نتائج دیکھنے پڑتے تھے۔ تاہم اب گوگل کا کہنا ہے کہ صارفین طویل اور گفتگو جیسی سرچز کے ذریعے براہِ راست اپنی ضرورت کے مطابق معلومات حاصل کر سکیں گے۔
نئی تبدیلیوں کے بعد گوگل سرچ محض ایک سرچ انجن نہیں رہے گا بلکہ ایک ایسا پلیٹ فارم بن جائے گا جہاں صارفین مصنوعی ذہانت کے ساتھ مکالمے کی صورت میں معلومات حاصل کر سکیں گے — بالکل ویسے ہی جیسے جیمنائی کے ساتھ گفتگو کی جاتی ہے۔