او کلاک‘ کہنے کی روایت کیسے شروع ہوئی؟ صدیوں پرانی انگریزی اصطلاح کی دلچسپ تاریخ

روزمرہ گفتگو میں وقت بتاتے ہوئے انگریزی زبان میں ’او کلاک‘ کا استعمال عام ہے۔ ہم اکثر ایک بجے کو ’ون او کلاک‘ اور سات بجے کو ’سیون او کلاک‘ کہتے ہیں، لیکن اس اصطلاح کی ابتدا کیسے ہوئی اور اس کا اصل مطلب کیا ہے؟ اس کے پیچھے انگریزی زبان کی کئی صدیوں پرانی تاریخ موجود ہے۔

لسانی ماہرین کے مطابق ’او کلاک‘ دراصل انگریزی کے قدیم فقرے ’آف دی کلاک‘ (Of the clock) سے نکلا ہے، جس کے معنی ہیں ’گھڑی کے مطابق‘۔

ماضی میں وقت معلوم کرنے کے ذرائع آج کی طرح عام اور آسان نہیں تھے۔ لوگ سورج کی حرکت، سائے اور چرچ کی گھنٹیوں کی مدد سے وقت کا اندازہ لگاتے تھے۔ تاہم جب یورپ میں عوامی مقامات پر مکینیکل گھڑیاں نصب ہونا شروع ہوئیں تو لوگوں کے لیے وقت جاننے کا ایک نیا ذریعہ پیدا ہوگیا۔

اس دور میں گھڑی کے مطابق وقت بتانے کے لیے ’آف دی کلاک‘ کی ترکیب استعمال کی جاتی تھی۔ مثال کے طور پر تین بجے بتانے کے لیے ’تھری آف دی کلاک‘ کہا جاتا تھا، جو وقت گزرنے کے ساتھ مختصر ہوکر موجودہ لفظ ’او کلاک‘ بن گیا۔

’او کلاک‘ کی تاریخ کتنی پرانی ہے؟

تاریخی لغوی شواہد کے مطابق اس اصطلاح کی ابتدائی شکل چودھویں صدی کے آخر میں تحریری طور پر ملتی ہے۔ 1389 کے ایک ریکارڈ میں ’آف دی کلاکے‘ (Of the clokke) کے الفاظ بھی درج ہیں۔

بعد کے ادوار میں اس کے تلفظ اور ہجوں میں تبدیلی آتی رہی، یہاں تک کہ یہ اپنی موجودہ شکل میں انگریزی زبان کا مستقل حصہ بن گیا۔

ماضی میں وقت پوچھنے کا انداز بھی مختلف تھا

اس اصطلاح سے جڑا ایک دلچسپ پہلو یہ بھی ہے کہ پہلے لوگ وقت معلوم کرنے کے لیے ایسے جملے استعمال کرتے تھے جو آج کم سننے کو ملتے ہیں۔

مثلاً ’واٹ از او کلاک؟‘ اور ’واٹ او کلاک از اٹ؟‘ جیسے سوالات ماضی میں رائج تھے، جبکہ آج کل وقت پوچھنے کے لیے ’واٹ ٹائم اِز اِٹ؟‘ زیادہ عام ہے۔

آج بھی ’او کلاک‘ کیوں استعمال ہوتا ہے؟

وقت معلوم کرنے کے جدید ذرائع اور ڈیجیٹل گھڑیوں کی موجودگی کے باوجود ’او کلاک‘ کا استعمال برقرار ہے۔ اس کی ایک وجہ زبان کی وہ روایت ہے جس میں پرانے الفاظ اپنی ابتدائی ضرورت ختم ہونے کے بعد بھی روزمرہ گفتگو کا حصہ رہتے ہیں۔

البتہ انگریزی میں ’او کلاک‘ کا استعمال مکمل گھنٹے کے لیے کیا جاتا ہے۔ مثال کے طور پر سات بجے کو ’سیون او کلاک‘ کہا جاتا ہے، جبکہ سات بج کر تیس منٹ کے لیے ’سیون تھرٹی‘ کہنا زیادہ عام ہے۔

یوں روزمرہ زندگی میں استعمال ہونے والی یہ مختصر اصطلاح دراصل انگریزی زبان کے تاریخی ارتقا اور وقت معلوم کرنے کے قدیم طریقوں کی ایک دلچسپ یادگار ہے۔