پاکستان میں ریٹیل اسٹورز کے لیے ڈیجیٹل پیمنٹس لازمی قرار

اسلام آباد: پاکستان کی حکومت نے ملک بھر کے ریٹیل اسٹورز اور خوردہ فروشوں کے لیے یہ لازمی قرار دیا ہے کہ وہ کم از کم ایک ڈیجیٹل ادائیگی کا طریقہ فراہم کریں۔ اس میں خاص طور پر کیو آر (QR) کوڈ کی سہولت شامل ہے۔
یہ اقدام کیش لیس پاکستان پروگرام کے تحت اٹھایا گیا ہے، جس کا مقصد نقدی پر انحصار کو کم کرنا، مالی شفافیت کو فروغ دینا اور ڈیجیٹل معیشت کو مضبوط بنانا ہے۔
وزیر مملکت برائے خزانہ بلال اظہار کیانی نے بتایا کہ ہر ریٹیل آؤٹ لیٹ کو کم از کم ایک قابل قبول ڈیجیٹل ادائیگی کا نظام فراہم کرنا ہو گا، جیسے کہ کیو آر کوڈ یا دیگر آن لائن پیمنٹ آپشنز۔
وفاقی اور صوبائی سطح پر اس فیصلے کے مؤثر نفاذ کے لیے قانونی فریم ورک تیار کیا جا رہا ہے تاکہ اس اقدام کو مستقل بنیادوں پر نافذ کیا جا سکے۔
حکام کے مطابق، اس پالیسی کے نفاذ سے کیش لیس ادائیگیوں کا رجحان بڑھے گا، غیر رجسٹرڈ کاروباروں کی نگرانی آسان ہو گی اور مالی شفافیت میں اضافہ ہو گا۔
ریٹیلرز کو ہدایت کی گئی ہے کہ وہ ڈیجیٹل ادائیگی کے نظام کو اپنائیں، بصورت دیگر متعلقہ حکام کارروائی کر سکتے ہیں۔ یہ اقدام وزارت خزانہ اور اسٹیٹ بینک آف پاکستان کی ڈیجیٹل پالیسی کے تحت کیا گیا ہے، جس کا مقصد مالی شمولیت بڑھانا اور ڈیجیٹل پیمنٹس کو فروغ دینا ہے۔
حکام نے کہا کہ صارفین اب نقدی کے بغیر بھی آسانی سے خریداری کر سکیں گے، اور یہ اقدام پاکستان کی ڈیجیٹل معیشت میں ایک اہم پیش رفت ہے۔