چین میں فیکٹری حادثے کے بعد نایاب کان کی سرجری کامیاب

چین کے شہر شینڈونگ میں ایک فیکٹری کی ملازمہ ایک سنگین حادثے کا شکار ہوئی، جس میں اس کے بال ہیوی مشینری میں پھنس گئے۔ خوش قسمتی سے اس کی جان محفوظ رہی، لیکن اس کا بایاں کان، سر اور جلد کا کچھ حصہ شدید متاثر ہوا۔

حادثے کے فوری بعد ڈاکٹروں نے فیصلہ کیا کہ کان کی اصل جگہ پر فوری سرجری خطرناک ہو سکتی ہے، کیونکہ اس سے خون کی نالیاں متاثر ہو سکتی تھیں۔ اس لیے متاثرہ کان کو عارضی طور پر اس کے پیر سے جوڑ دیا گیا، تاکہ جلد اور خون کی نالیاں محفوظ رہ سکیں اور بعد میں اصل جگہ پر ٹرانسپلانٹ ممکن ہو۔

ماہر چینی سرجنز کی ٹیم نے یہ پیچیدہ سرجری تقریباً 10 گھنٹے میں مکمل کی۔ دورانِ علاج، خاتون نے پیر سے جڑے کان کو تحفظ دینے کے لیے ڈھیلے جوتے پہن کر چلنا جاری رکھا تاکہ خون کا بہاؤ معمول کے مطابق رہ سکے۔

اکتوبر میں ڈاکٹرز نے متاثرہ کان کو خاتون کے اصل مقام پر منتقل کرنے کی حتمی سرجری کی، جو کامیابی سے انجام پائی۔ ڈاکٹروں کے مطابق یہ ایک نایاب اور انتہائی پیچیدہ سرجری تھی، جس میں خاتون کی زندگی اور کان کی صحت دونوں کو بحال کیا گیا۔