ترکیہ کا تاریخی کارنامہ: کِزِل ایلما نے پہلی بار فضا میں دشمن طیارے کا کامیاب شکار کیا

ترکیہ کے جدید بغیر پائلٹ لڑاکا طیارے کِزِل ایلما نے ایک اہم سنگِ میل عبور کرتے ہوئے پہلی بار گُک دُوغان ایئر ٹو ایئر میزائل کو جٹ طیارے کے ہدف پر کامیابی سے فائر کیا ہے۔ یہ کارنامہ عالمی سطح پر کسی بھی یو سی اے وی کی پہلی تصدیق شدہ فضائی جنگی کامیابی قرار دیا جا رہا ہے۔

ترک دفاعی ٹیکنالوجی کے ادارے بائیکر کے مطابق، میزائل نے ہدف کو مقامی طور پر تیار کردہ موراد ریڈار کی مدد سے نشانہ بنایا، جس سے ثابت ہوا کہ ترکیہ کے قومی پلیٹ فارمز ملکی ہتھیاروں اور سینسرز کے ساتھ مکمل ہم آہنگی رکھتے ہیں۔

ٹیسٹ مشن کے دوران مرزیفون ایئر بیس سے پانچ ایف-15 طیاروں نے کِزِل ایلما کے ساتھ مشترکہ پرواز کی، جبکہ بائیکر کے آکِن جی ڈرون نے یہ کارروائی فضا سے ریکارڈ کی۔ کِزِل ایلما کا اسٹیلتھ ڈیزائن، جدید سینسرز اور کم ریڈار ظاہر ہونے والی ساخت اسے دور سے اہداف کا سراغ لگانے اور دشمن کے ریڈار پر کم نمایاں رہنے کی صلاحیت دیتے ہیں۔

طیارہ موراد ریڈار، ٹوئی گن ہدفی نظام اور مختلف مقامی ہتھیاروں سے لیس ہے۔ اس سے پہلے بھی کِزِل ایلما نے تجرباتی مراحل میں تولن اور تیبر-82 ہتھیاروں کے ساتھ کامیاب مشنز انجام دیے تھے۔

بائیکر 2003 سے بغیر پائلٹ فضائی ٹیکنالوجی میں سرمایہ کاری کر رہا ہے اور عالمی مارکیٹ میں نمایاں حیثیت رکھتا ہے۔ کمپنی نے 2023 اور 2024 میں تقریباً 1.8 ارب ڈالر کی سالانہ برآمدات کیں، جن میں سے 90 فیصد سے زائد آمدن بین الاقوامی مارکیٹ سے حاصل ہوئی۔ بائیکر اب تک بائراکتار ٹی بی-2 کے لیے 36 اور بائراکتار آکِن جی کے لیے 16 ممالک کے ساتھ ایکسپورٹ معاہدے کر چکا ہے