پاکستانی ڈراما ’درِ نجات‘ عرب دنیا میں نشر ہونے کے لیے تیار

0
19
پاکستانی ڈراما ’درِ نجات‘ عرب دنیا میں نشر ہونے کے لیے تیار

پاکستانی ڈراما انڈسٹری کی ایک اور پروڈکشن عالمی سطح پر متعارف ہونے جا رہی ہے۔ مقبول ڈراما سیریل ’درِ نجات‘ کو عربی زبان میں ڈب کرکے معروف ٹی وی نیٹ ورک ایم بی سی (MBC) پر نشر کرنے کی تیاری مکمل کرلی گئی ہے۔

اس پیشرفت کے بعد مشرق وسطیٰ اور شمالی افریقہ کے ناظرین بھی پاکستانی ڈراموں کی کہانیوں اور فنکاروں کی اداکاری سے لطف اندوز ہوسکیں گے۔

عمیرہ احمد کے تحریر کردہ اس ڈرامے کی ہدایات ثاقب خان نے دی ہیں۔ کہانی میں محبت، خاندانی رشتوں، مذہبی تصورات، جدائی، معافی اور زندگی کو نئے سرے سے شروع کرنے جیسے موضوعات کو نمایاں کیا گیا ہے۔

ڈرامے کی مرکزی کاسٹ میں درفشاں سلیم، شہریار منور اور نمیر نواز خان شامل ہیں، جنہوں نے بالترتیب زریاب، ابوبکر اور زامل کے کردار ادا کیے ہیں۔ اس کے علاوہ رومیسہ خان بھی اہم کردار میں دکھائی دی ہیں۔

کہانی بچپن کے دوست زریاب اور زامل کے گرد گھومتی ہے، جن کے درمیان محبت کا رشتہ وقت کے ساتھ مختلف آزمائشوں کا شکار ہوجاتا ہے۔ زامل کی حمنہ سے شادی اور زریاب کی زندگی میں ابوبکر کی آمد کہانی کو ایک نیا رخ دیتی ہے، جبکہ دونوں خاندانوں کے ماضی سے جڑے راز بھی رفتہ رفتہ سامنے آتے ہیں۔

دیگر نمایاں فنکاروں میں ثانیہ سعید، صبا حمید، فاران طاہر، نادیہ افگن، سحر ہاشمی، محمود اسلم، عدنان جعفر اور عدنان شاہ ٹیپو شامل ہیں۔

عربی زبان میں ڈرامے کی پیشکش پاکستانی انٹرٹینمنٹ انڈسٹری کے لیے ایک اہم پیشرفت ہے، جس سے پاکستانی ڈراموں کو عرب دنیا میں مزید ناظرین تک پہنچنے کا موقع ملنے کی توقع ہے۔

Leave a reply