آئی سی سی پلیئر آف دی منتھ: پاکستانی عرافات منہاس سمیت تین کرکٹرز نامزد

انٹرنیشنل کرکٹ کونسل (آئی سی سی) نے اکتوبر 2026 کے مینز پلیئر آف دی منتھ ایوارڈ کے لیے پاکستان کے آل راؤنڈر عرافات منہاس سمیت تین کھلاڑیوں کو نامزد کیا ہے۔ دیگر نامزد کھلاڑیوں میں جنوبی افریقا کے مارکو یانسن اور ویسٹ انڈیز کے کپتان شائی ہوپ شامل ہیں۔

عرافات منہاس نے اکتوبر میں انگلینڈ اور سری لنکا کے خلاف ہوم ون ڈے ٹرائی سیریز میں بیٹنگ اور بولنگ دونوں شعبوں میں عمدہ کارکردگی کا مظاہرہ کیا۔ انہوں نے پانچ میچز میں 149 رنز بنانے کے ساتھ 9 وکٹیں بھی حاصل کیں۔

انگلینڈ کے خلاف ایک اہم مقابلے میں عرافات نے پہلے 59 رنز کی اننگز کھیلی اور پھر صرف 40 رنز دے کر 6 کھلاڑیوں کو پویلین کی راہ دکھائی۔ اسی طرح سری لنکا کے خلاف فائنل میں انہوں نے 31 گیندوں پر 61 رنز بنا کر پاکستان کو 326 رنز کا ہدف حاصل کرنے میں اہم کردار ادا کیا۔ ٹورنامنٹ میں انکی کارکردگی پر انہیں پلیئر آف دی سیریز بھی قرار دیاگیا۔

جنوبی افریقا کے آل راؤنڈر مارکو یانسن نے آسٹریلیا کے خلاف ٹیسٹ سیریز میں اپنی صلاحیتوں کا بھرپور مظاہرہ کیا۔ جنوبی افریقا نے یہ سیریز 1-2 سے اپنے نام کی۔ یانسن نے دوسرے ٹیسٹ میں 85 رنز بنانے کے علاوہ 6 وکٹیں حاصل کیں، جبکہ تیسرے اور فیصلہ کن ٹیسٹ میں بھی نصف سنچری اسکور کرنے کے ساتھ 3 وکٹیں اپنے نام کیں۔ ان کی کارکردگی کے باعث وہ آئی سی سی ٹیسٹ آل راؤنڈر رینکنگ میں پہلے نمبر پر پہنچ گئے۔

ویسٹ انڈیز کے کپتان شائی ہوپ نے بھی اکتوبر میں بھارت کے خلاف محدود اوورز کی کرکٹ میں نمایاں کھیل پیش کیا۔ انہوں نے تیسرے ون ڈے میچ میں ناقابلِ شکست 162 رنز کی اننگز کھیل کر ویسٹ انڈیز کو 352 رنز کا ہدف عبور کرنے میں مدد دی۔ یہ ون ڈے کرکٹ میں ویسٹ انڈیز کا سب سے بڑا کامیاب ہدف کا تعاقب تھا۔

شائی ہوپ نے بھارت کے خلاف پانچ میچز کی ٹی 20 سیریز میں بھی شاندار بیٹنگ کی اور مجموعی طور پر 261 رنز بنائے۔ ان کا اسٹرائیک ریٹ 190.51 رہا، جبکہ چوتھے ٹی 20 میچ میں انہوں نے صرف 50 گیندوں پر ناقابلِ شکست 102 رنز اسکور کیے۔

تینوں کھلاڑیوں کی اکتوبر میں شاندار کارکردگی کے بعد اب آئی سی سی مینز پلیئر آف دی منتھ ایوارڈ کے لیے ان کے درمیان مقابلہ ہوگا۔