عالمی مارکیٹ میں سونا دو ہفتوں کی کم ترین سطح پر آگیا

عالمی بلین مارکیٹ میں سونے کی قیمت میں نمایاں کمی دیکھی گئی ہے، جس کے بعد فی اونس نرخ 4 ہزار 85 ڈالر کی سطح پر آگئے۔ یہ قیمت 14 اکتوبر کے بعد کم ترین سطح ہے۔ ماہرین کے مطابق تیل کی بڑھتی قیمتوں اور افراطِ زر کے خدشات نے سونے کی عالمی طلب اور قیمتوں پر دباؤ بڑھا دیا ہے۔

عالمی مارکیٹ میں اسپاٹ گولڈ کی قیمت 1.3 فیصد کمی کے بعد 4,085.29 ڈالر فی اونس ریکارڈ کی گئی، جبکہ دسمبر میں فراہمی کے لیے امریکی گولڈ فیوچرز 1.2 فیصد گر کر 4,100.90 ڈالر فی اونس پر آگئے۔

مارکیٹ تجزیہ کاروں کے مطابق توانائی کی قیمتوں میں اضافے سے مہنگائی بڑھنے کا خدشہ ہے۔ ایسی صورتِ حال میں مرکزی بینک شرحِ سود بلند سطح پر برقرار رکھ سکتے ہیں، جس سے سونے میں سرمایہ کاری کی کشش کم ہوجاتی ہے، کیونکہ سونا سرمایہ کاروں کو سود کی مد میں کوئی آمدنی فراہم نہیں کرتا۔

سرمایہ کاروں کی توجہ امریکی مرکزی بینک، فیڈرل ریزرو، کے آئندہ اجلاس اور اہم معاشی اعداد و شمار پر مرکوز ہے۔ شرحِ سود سے متعلق فیصلے اور مہنگائی کے نئے اعداد و شمار سونے کی قیمتوں کی آئندہ سمت متعین کرنے میں اہم کردار ادا کرسکتے ہیں۔

اس حوالے سے امریکی ذاتی کھپت کے اخراجات (پی سی ای) کا ڈیٹا بھی اہمیت رکھتا ہے، کیونکہ فیڈرل ریزرو مہنگائی کی صورتِ حال کا جائزہ لینے کے لیے اس اشاریے کو استعمال کرتا ہے۔ اس ڈیٹا کے نتائج مستقبل کی مالیاتی پالیسی کے بارے میں مارکیٹ کی توقعات پر اثر انداز ہوسکتے ہیں۔

تکنیکی تجزیے کے مطابق سونے کے لیے 4,073 ڈالر فی اونس کی سطح اہم سپورٹ سمجھی جارہی ہے۔ دوسری جانب 4,135 ڈالر کی سطح عبور ہونے کی صورت میں قیمت 4,150 سے 4,169 ڈالر فی اونس تک پہنچ سکتی ہے۔