رونالڈو کا پرتگال کے تربیتی کیمپ سے اچانک روانگی، ’’مناسب وقت پر سچ بتاؤں گا

پرتگال کے عالمی شہرت یافتہ فٹبالر کرسٹیانو رونالڈو نے قومی ٹیم کا تربیتی کیمپ چھوڑنے کے بعد پہلی بار اپنے فیصلے پر ردعمل ظاہر کردیا۔

رونالڈو نے سوشل میڈیا پر جاری بیان میں کہا ہے کہ وہ وقت آنے پر ان وجوہات کے بارے میں تفصیل سے بات کریں گے جن کے باعث انہیں پرتگال کیمپ سے الگ ہونا پڑا۔

ان کے مطابق پرتگال کے ہیڈ کوچ جارجے جیسس کی پریس کانفرنس اور پرتگالی فٹبال فیڈریشن کے صدر پیڈرو پروینسا سے ہونے والی گفتگو کے بعد انہوں نے کیمپ چھوڑنے کا فیصلہ کیا۔

رونالڈو نے اپنے پیغام میں کہا کہ انہوں نے ہمیشہ پرتگال کی قومی ٹیم کے لیے مکمل وابستگی کے ساتھ خدمات انجام دی ہیں، تاہم مناسب وقت پر وہ عوام کو اس معاملے کی حقیقت سے آگاہ کریں گے۔

یہ پیش رفت ایسے وقت میں ہوئی جب ناروے کے خلاف میچ میں رونالڈو کو ابتدائی ٹیم میں شامل نہ کیے جانے کے بعد کوچ اور اسٹار کھلاڑی کے درمیان اختلافات کی خبریں سامنے آئی تھیں۔

پرتگال نے ناروے کو 2-1 سے شکست دی تھی، تاہم رونالڈو پورے میچ کے دوران بینچ پر موجود رہے اور میدان میں نہیں اترے۔ رپورٹس کے مطابق ابتدا میں انہیں میچ کے دوران متبادل کے طور پر میدان میں بھیجنے کا امکان تھا، لیکن بعد میں یہ فیصلہ تبدیل کردیا گیا۔

اس واقعے کے بعد رونالڈو نے ٹیم کی معمول کی ٹریننگ کے بجائے جم میں وقت گزارا۔ رپورٹس میں بتایا گیا کہ وہ انجری کا شکار نہیں تھے۔

ہیڈ کوچ جارجے جیسس نے بعد ازاں وضاحت کرتے ہوئے کہا کہ کھلاڑیوں کا انتخاب کوچ کی ذمہ داری ہے۔ ان کے مطابق رونالڈو کو پہلے ہی بتایا گیا تھا کہ وہ میچ کا آغاز نہیں کریں گے اور انہیں متبادل کھلاڑیوں کے ساتھ بینچ پر رہنا ہوگا۔

کوچ نے یہ بھی تسلیم کیا کہ رونالڈو اس فیصلے سے خوش نہیں تھے، تاہم ان کا کہنا تھا کہ معاملہ اب ختم ہوچکا ہے۔

رونالڈو نے بدھ کے روز ڈنمارک کے دارالحکومت کوپن ہیگن میں پرتگال کا تربیتی کیمپ چھوڑ دیا، جہاں ٹیم ڈنمارک کے خلاف نیشنز لیگ کے میچ کی تیاریوں میں مصروف تھی۔ پرتگالی فٹبال فیڈریشن نے بھی ان کیمپ سے روانگی کی تصدیق کی۔

رونالڈو نے تاحال بین الاقوامی فٹبال سے ریٹائرمنٹ کا باضابطہ اعلان نہیں کیا۔ ان کی حالیہ روانگی کے بعد البتہ ان کے قومی ٹیم کے مستقبل کے حوالے سے بحث ایک بار پھر شروع ہوگئی ہے۔

41 سالہ رونالڈو پرتگال کی جانب سے سب سے زیادہ بین الاقوامی میچز کھیلنے والے کھلاڑی ہیں۔ وہ دو دہائیوں سے زائد عرصے سے قومی ٹیم کا حصہ ہیں اور 234 میچز میں 146 گول کے ساتھ پرتگال کے ریکارڈ اسکورر بھی ہیں۔