خامنہ ای کہاں ہیں؟ ٹرمپ کے نئے دعوے نے معمہ الجھا دیا

امریکی صدر ڈونلڈ ٹرمپ نے دعویٰ کیا ہے کہ ایران کے سپریم لیڈر مجتبیٰ خامنہ ای ہلاک نہیں ہوئے بلکہ شدید زخمی ہیں۔ تاہم اس دعوے کی آزاد ذرائع سے تاحال تصدیق نہیں ہوسکی۔
ٹرمپ نے ایک انٹرویو میں کہا کہ ان کے خیال میں مجتبیٰ خامنہ ای کے جسم کا بایاں حصہ، بازو اور ٹانگ بری طرح متاثر ہوئے ہیں۔ امریکی صدر کے مطابق اگر ایرانی سپریم لیڈر واقعی ہلاک ہوچکے ہیں تو ایرانی حکام اس معاملے کو چھپا رہے ہیں۔
ٹرمپ نے ایران کے خلاف امریکی فوجی اور معاشی دباؤ کو بھی مؤثر قرار دیتے ہوئے کہا کہ واشنگٹن اپنے مقاصد کے حصول کی جانب بڑھ رہا ہے اور ایران کے ساتھ تنازع میں بڑی کامیابی متوقع ہے۔
آبنائے ہرمز سے متعلق امریکی صدر نے دعویٰ کیا کہ سمندری راستہ مکمل طور پر بحال ہے اور امریکی بحریہ نے وہاں موجود بارودی سرنگیں صاف کردی ہیں۔ ان کا کہنا تھا کہ بڑی تعداد میں بحری جہاز آبنائے سے گزر رہے ہیں۔
دوسری جانب آبنائے ہرمز کی صورتحال کے حوالے سے مکمل معمول کی بحالی پر اب بھی اختلاف پایا جاتا ہے، جبکہ ایران اور عمان کے درمیان عارضی بحری راہداری سے متعلق بات چیت جاری ہے۔
مجتبیٰ خامنہ ای کے زخمی یا ہلاک ہونے سے متعلق ٹرمپ کے دعوے کی آزادانہ تصدیق سامنے آنے تک اسے حتمی خبر قرار نہیں دیا جاسکتا۔