ہونڈا نے نیا لوگو متعارف کروا کر برقی گاڑیوں کے دور کی تیاری کااعلان کردیا

جاپانی آٹو میکر ہونڈا موٹر نے اپنی مشہور علامت “H” کا نیا اور جدید ڈیزائن پیش کیا ہے، جو مستقبل میں ہونڈا کی گاڑیوں کی پہچان بنے گا۔ یہ نیا لوگو کمپنی کے اس منصوبے کی عکاسی کرتا ہے کہ وہ 2027 سے نئی برقی (EV) اور ہائبرڈ گاڑیوں کی سیریز متعارف کرانے جا رہی ہے۔
ہونڈا کے مطابق نیا لوگو محض ڈیزائن نہیں بلکہ کمپنی کے مستقبل کے وژن کی علامت ہے۔ اسے دو کھلے ہاتھوں کی شکل میں ڈیزائن کیا گیا ہے، جو کھلے پن، تعاون اور صارفین کی خدمت کے عزم کی نمائندگی کرتا ہے۔ کمپنی کا کہنا ہے کہ یہ ڈیزائن اس عزم کی عکاسی کرتا ہے کہ ہونڈا نقل و حرکت کے نئے امکانات پیدا کرنے کے لیے جدت کے سفر میں آگے بڑھتا رہے گا۔
ہونڈا اس نئے لوگو کو اپنی آنے والی “ہونڈا زیرو سیریز” سمیت دیگر برقی اور ہائبرڈ گاڑیوں، شورومز، موٹر اسپورٹس سرگرمیوں اور ادارہ جاتی مقامات پر استعمال کرے گا۔ کمپنی نے اس تبدیلی کو اپنی “دوسری بنیاد” قرار دیا ہے، جس کے ذریعے وہ عالمی آٹو انڈسٹری میں الیکٹرک دور کے تقاضوں کے مطابق خود کو ہم آہنگ کر رہی ہے۔
ہونڈا کا کہنا ہے کہ نیا لوگو اس بات کی علامت ہے کہ وہ جدید ٹیکنالوجی اور الیکٹرک انقلاب میں قیادت کرے گی، نئے ماڈلز تخلیق کرے گی اور پرانے اصولوں کو نئے زاویوں سے چیلنج کرے گی۔
یہ اقدام اس بات کی مثال ہے کہ کس طرح آٹو کمپنیاں روایات کو برقرار رکھتے ہوئے جدت اور مستقبل کی تیاری کو ساتھ لے کر چل سکتی ہیں۔