ڈیجیٹل دور اور ذہنی دباؤ: بابا وانگا کی پیشگوئی پر نئی بحث

بلغاریہ سے تعلق رکھنے والی معروف نابینا پیشگو بابا وانگا ایک بار پھر عوامی توجہ کا مرکز بن گئی ہیں، اس مرتبہ وجہ ان سے منسوب وہ پیشگوئی ہے جس میں جدید ٹیکنالوجی اور موبائل آلات کے بڑھتے ہوئے استعمال پر خبردار کیا گیا تھا۔
مختلف رپورٹس کے مطابق بابا وانگا کا کہنا تھا کہ آنے والے وقت میں انسان چھوٹے الیکٹرانک آلات پر غیر معمولی حد تک انحصار کرنے لگے گا۔ اگرچہ یہ ٹیکنالوجی روزمرہ کاموں کو آسان بنائے گی، لیکن اس کے منفی اثرات انسانی عادات اور سماجی تعلقات پر بھی مرتب ہوں گے۔
ان کے مطابق ڈیجیٹل ڈیوائسز کے بڑھتے ہوئے استعمال سے لوگوں کے درمیان فاصلہ بڑھے گا اور براہِ راست میل جول میں کمی آئے گی۔ انہوں نے یہ بھی کہا تھا کہ یہ ٹیکنالوجی انسان کی توجہ برقرار رکھنے کی صلاحیت کو متاثر کرے گی، خاص طور پر بچے اور نوجوان ذہنی دباؤ اور نفسیاتی مسائل کا زیادہ شکار ہو سکتے ہیں۔
بابا وانگا کی پیشگوئی کے مطابق وقت گزرنے کے ساتھ یہ آلات ایک ایسی عادت میں بدل سکتے ہیں جس سے تنہائی، بے چینی اور ذہنی دباؤ عالمی سطح پر بڑھنے کا خدشہ ہے۔
موجودہ دور میں اسمارٹ فونز اور ڈیجیٹل ٹیکنالوجی نے انسانی زندگی کو بے حد سہل بنا دیا ہے، تاہم ماہرین کا بھی ماننا ہے کہ ان کا حد سے زیادہ استعمال، خصوصاً کم عمر افراد میں، ذہنی صحت اور سماجی روابط پر منفی اثرات ڈال رہا ہے۔ اسی وجہ سے موبائل فون کے ضرورت سے زیادہ استعمال کو اب ایک اہم سماجی مسئلہ سمجھا جانے لگا ہے۔