پولیس اسٹیشن کے نقشے اور اسلحہ کے ساتھ پاکستانی نژاد امریکی طالب علم گرفتار

امریکی ریاست ڈیلاویئر میں قانون نافذ کرنے والے اداروں نے ایک پاکستانی نژاد امریکی نوجوان کو اسلحہ رکھنے اور حملے کی منصوبہ بندی کے شبہے میں حراست میں لے لیا۔ حکام کے مطابق 25 سالہ لقمان خان کو 24 نومبر کی رات اُس وقت گرفتار کیا گیا جب پولیس نے کینبی پارک ویسٹ کے علاقے میں ایک ٹرک کو روکا۔ پولیس کے مطابق ملزم نے گاڑی سے باہر نکلنے کے احکامات نہ مانے اور مزاحمت کی، جس کے بعد اسے گرفتار کیا گیا۔

تلاشی کے دوران ٹرک سے ایک پستول، میگزین اور مبینہ حملے سے متعلق دستاویزات ملی ہیں جن میں یونیورسٹی آف ڈیلاویئر کے پولیس اسٹیشن کا نقشہ، داخلی اور خارجی راستوں کی نشاندہی اور ایک پولیس افسر کا نام درج تھا۔

اگلے روز، ایف بی آئی نے 25 نومبر کو ملزم کے گھر پر چھاپہ مارا جہاں سے مزید جدید اسلحہ برآمد ہونے کی اطلاع ملی ہے۔

امریکی حکام کا کہنا ہے کہ لقمان خان امریکی شہری اور یونیورسٹی آف ڈیلاویئر کا طالب علم ہے، جبکہ اس کے خلاف اس سے قبل کسی قسم کا مجرمانہ ریکارڈ موجود نہیں تھا۔ ملزم کو 11 دسمبر کو عدالت میں پیش کیا جائے گا۔